ވައިގެ މަގުން އެތެރެކުރަން އުޅުނު 5.9 ކިލޯގެ މަސްތުވާތަކެތި އަތުލައިގެންފި އެވެ.

މިއީ ފަހުގެ ތާރީހެއްގައި ރާއްޖެ އެތެރެކުރަން އުޅެނިކޮށް އަތުލައިގަތް އެންމެ ގިނަ އަދަދެއްގެ މަސްތުވާތަކެއްޗެވެ.

ކަސްޓަމްސްއިން މިއަދު މީޑިއާތަކަށް ފޮނުވި މެސެޖުގައި ބުނީ އެ ތަކެތި އަތުލައިގަތީ މިދިޔަ ބުރާސްފަތި ދުވަހު ތައިލެންޑްގެ ބެންކޮކުން ރާއްޖެ ގެނައި އެއާރފްރައިޓް ޝިޕްމަންޓެއްގައި ޝައްކުކުރެވޭ ޒާތުގެ ބާވަތްތަކެއް ހުރުމުން އިތުރަށް ބަލާ ފާސްކުރުމުގެ ތެރޭގައި ކަމަށެވެ.

އެގޮތުން ފުރަތަމަ މަރުހަލާގައި އެ ތަކެތި ތަޙުލީލުކުރިއިރު، މަސްތުވާތަކެތީގެ ތަފާތު ދެ ބާވަތަކަށް ޕޮޒިޓިވްވި ކަމަށް ކަސްޓަމްސްއިން ބުނެފައި ވެއެވެ. އެއީ 5.5 ކިލޯގެ ކެނެބިސްއާއި 416 ގްރާމްގެ ކެތިނޯން އެވެ. އަދި ޖުމްލަ ބަރުދަނުގައި 5.9 ކިލޯ ހުރިކަމަށް ކަސްޓަމްސްއިން ބުނެފައި ވެއެވެ.

އެތަކެތީގެ މަގުމަތީ އަގު 3.3 މިލިއަން ރުފިޔާއަށް އަރާނެކަމަށް ކަސްޓަމްސްއިން އަންދާޒާކުރެ އެވެ.

އެ މައްސަލައިގައި 45 އަހަރުގެ ފިރިހެނަކާއެކު އަތުލައިގަތް މަސްތުވާތަކެތި މިހާރު ފުލުހުންނާ ހަވާލުކޮށްފައިވާ ކަމަށް ކަސްޓަމްސްއިން ބުނެފައި ވެއެވެ.