ރާއްޖޭގެ މަސްވެރިކަން ތަރައްގީކުރުމަށްޓަކައި މި ދައުރުގައި ރަނގަޅު މަސައްކަތްތަކެއް ކުރެވި ރަނގަޅު ބިންގަލެއް އެޅިއްޖެކަމަށް ފިޝަރީޒް މިނިސްޓަރު އަޙްމަދު ޝިޔާމް ވިދާޅުވެއްޖެއެވެ.

ޕީއެސްއެމްގެ ޕްރޮގްރާމެއްގައި ވާހަކަ ދައްކަވަމުން ޝިޔާމް މިރޭ ވަނީ މަސްވެރިކަމާ ގުޅޭގޮތުން މި ސަރުކާރުން ކުރަމުންދާ މުހިންމު ކަންކަމަށް އަލިއަޅުއްވާލައްވާފައެވެ.

ޝިޔާމް ވިދާޅުވީ، މަސްވެރިކަމަށް ދިމާވެފައިވާ އެންމެބޮޑު އެއް ދައްޗަކީ ކޯލްޑް ސްޓޯރޭޖު ކެޕޭސިޓީ ދަށްވުންކަމަށާއި މިހާރު ހުރި ކޯލްޑް ސްޓޯރޭޖު ކެޕޭސިޓީ ދެގުނަ ކުރުމަކީ ރައީސް ޑރ. މުޙައްމަދު މުޢިއްޒުގެ ވައުދެއްކަމަށެވެ.

އެހެންކަމުން، އެއާ ގުޅުންހުރި ގިނަ މަސައްކަތްތަކެއް މިހާރު ވެސް ކުރިއަށް އެބަ ދާކަމަށާއި، މި ދައުރުގައި މިހާރުވަނީ އެފަދަ މަޝްރޫއުތަކަށް ބޭނުންވާ ފައިސާ ހަމަޖެއްސުމަށް ގިނަ މަސައްކަތްތަކެއް ކުރެވި އެކަމުގައި ކުރިއެރުންތަކެއް ހޯދިފައިކަމަށް ޝިޔާމް ވިދާޅުވިއެވެ. ޝިޔާމް ވިދާޅުވީ އެއީ ސިނާއަތުގެ ކުރިމަގަށްޓަކައި އެޅުނު ރަނގަޅު ބިންގަލެއް ކަމަށެވެ.

އެގޮތުން ވިދާޅުވީ، މަސްވެރިކަމަށް އޮތް އެންމެ ބޮޑު ގޮންޖެހުމަކީ ކޯލްޑް ސްޓޯރޭޖު ކުޑަވުމުގެ ސަބަބުން ލަސްނުކޮށް ބޭރަށް އެކްސްޕޯޓު ކުރަންޖެހުން ކަމަށާއި ކަޅުބިލަމަހުގެ މަސްވެރިކަމުގައި ހަރަކާތްތެރިވާ ދޯނިފަހަރުގައި 60 ނުވަތަ 70 ޓަނު ކެޕޭސިޓީ އެބަހުރި ކަމަށާއި އެ ފަދަ ދޯނިތައް ފުރާ މަސްބާނައިގެން އަންނައިރު ފެސިލިޓީތަކުން މަސް ކިރުވުމުގައި ވަރަށް ބޮޑެތި ދަތިތަކާ ކުރިމަތިވާކަމަށެވެ.

ޚާއްޞަ ގޮތެއްގައި ކޫއްޑޫއާއި އައްޑޫ ހުޅުދޫއާއި ފެލިވަރު އަދި ޖުމުލަކޮށް މިފްކޯގެ ބެލުމުގެ ދަށުގައިހުރި އެ ނޫންވެސް ފެސިލިޓީތަކުގައި ޖުމުލަ ހުރީ 8500 ކަމަށްވުމަކީ މި ސިނާއަތަށް އޮތް ވަރަށް ބޮޑު ގޮންޖެހުމެއްކަމަށް ވިދާޅުވިއެވެ.