އިސްރާއިލުގެ ޕާސްޕޯޓުގައި ރާއްޖެ އެތެރެނުވެވޭ ގޮތަށް އިމިގްރޭޝަންގެ ގާނޫނަށް އިސްލާހު ގެންނަން އިދިކޮޅު އެމްޑީޕީން ހުށަހަޅާފައިވާ ބިލުގެ މަސައްކަތް 241 ކޮމިޓީގެ ބައްދަލުވުމުގައި ދިރާސާކުރަން ފަށަން ތާވަލުކޮށްފި އެވެ.

ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ހުށަހެޅުއްވި އެ ބިލު މަޖިލީހުގެ ތަޅުމުން ބަލައިގަނެ މަޖިލީހުގެ 241 ކޮމިޓީއަށް ފޮނުވީ މިދިޔަ ޖޫން މަހުގެ 10 ވަނަ ދުވަހު އެވެ.

އެހެން ނަމަވެސް އެ ބިލު ކޮމިޓީއަށް ފޮނުވުމަށް ފަހު ޕާކުކޮށްފައި އޮތްގޮތަށް އޮތީ އެވެ.

އެ މައްސަލައިގައި އިދިކޮޅު އެމްޑީޕީއާއި ޕީއެންއެފްގެ ފާޑުކިއުން އަމާޒުވެފައި އޮތްއިރު ހުދު ވެރިކަން ކުރާ ޕީއެންސީއިންވެސް މިދިޔަ މަހު ވަނީ އެބިލުގެ މަސައްކަތް އަވަސްކުރުމަށް ގޮވާލައިފަ އެވެ.

241 ކޮމިޓީގެ ނައިބު މުގައްރިރު އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހު މިއަދު ވިދާޅުވި އެ ބިލުގެ މަސައްކަތް ފަށަން އަންނަ އަންގާރަ ދުވަހު އޮންނަ 241 ކޮމިޓީގެ ބައްދަލުވުމަށް މިހާރު ތާވަލުކޮށްފައިވާ ކަމަަށެވެ.

އަދި އެ ބިލުގެ މަސައްކަތް ނިންމާނެ ސުންގަޑި އެ ދުވަހުގެ ކޮމިޓީގައި ނިންމާނެކަމަށް ވެސް ފަލާހު ވިދާޅުވި އެވެ.