އެމްޑީޕީ ސަރުކާރުގެ އިސްވެރިން ހައްޔަރުކުރަން މަޑަވެލި ދާއިރާގެ މެމްބަރު މުހައްމަދު ޝަމީޒް ގޮވާލައްވައިފި އެވެ.

ރައްޔިތުންގެ މަޖިލީހުގައި މިއަދު ކުރިއަށްދިޔަ ބަޖެޓުގެ ބަހުސްގައި ޝަމީޒް ވިދާޅުވީ އެމްޑީޕީ ސަރުކާރަކީ ނުރައްކާތެރި ފިކުރެއް ކަަމަށާއި އަދި އެމްޑީޕީއަކީ ގައުމަށް ބޭނުންވާ ވެސް ފިކުރެއް ނޫން ކަމަށެވެ.

އަދި އެމްޑީޕީން ވެރިކަމަށް އަންނަ ކޮންމެ ފަހަރަކު ކުރާާ ކަމަކީ ދީނަށް ފުރައްސާރަކޮށް ގައުމު ވިއްކާލުން އެކަނި ކަމަށް ވެސް އޭނާ ވިދާޅުވި އެވެ.

އަދި ނިމިގެން ދިޔަ ސަރުކާރުގައި ވެސް އެމްޑީޕީން ޗާގޯސްގެ ރަށްތައް ވިއްކާލިކަމަށް ވެސް ޝަމީޒް ތުހުމަތު ކުރެއްވި އެވެ. އަދި އެކަންކޮށްފައި ވަނީ ރޯމާ ދުވާލު ރައްޔިތުންގެ ކުރިމަތީގައި ކަމަށް ވެސް ޝަމީޒް ވިދާޅުވި އެވެ.

"އިއްޒަތްތެރި ރައީސް މިކަން ކުރި މީހުން ހިފައި ހައްޔަރު ކުރަން އަޅުގަނޑު ގޮވައިލަން، އަބްދުﷲ ޝާހިދު ހައްޔަރު ކުރަންވީ، އިބްރާހިމް މުހައްމަދު ސޯލިހު ހައްޔަރު ކުރަންވީ، ފައްޔާޒު ހައްޔަރު ކުރަންވީ، ފިނޭންސް މިނިސްޓަރަކަށް ހުރި އަމީރު ހައްޔަރު ކުރަންވީ، ކީއްވެތޯ ގާނޫނު ތަންފީޒު ނުކުރެވެނީ އިއްޒަތްތެރި ރައީސް، ގާނޫނު ތަންފީޒު ކުރެވެން ޖެހޭނެ،" ޝަމީޒު ވިދާޅުވި އެވެ.