4000 ފްލެޓް ލިބުނު މީހުންގެ ވަގުތީ ލިސްޓު އާއްމު ކުރުމަށް އިތުރު ވަގުތު ބޭނުންވާ ކަމަށް ގެދޮރުވެރިކަމާއި ބިމާއި ޢުމްރާނީ ތަރައްޤީއާ ބެހޭ ވުޒާރާއިން ހާމަކޮށްފިއެވެ.

ހައުސިން މިނިސްޓްރީން މިއަދު ނެރެފައިވާ ބަޔާނެއްގައި ބުނެފައިވަނީ ގެދޮރުވެރިޔާ ސްކީމްގެ ދަށުން ހުށަހެޅި 20،697 ފޯމު ބެލުމުގައި ކަށަވަރު ކުރަންޖެހޭ ގިނަ ކަންކަން ހުރުމުން، އެކަންކަން ބެލުމަށް އިތުރު ވަގުތު ބޭނުންވާ ކަމަށެވެ.

އެގޮތުން އެބަޔާނުގައި ބުނެފައިވަނީ، 2022 ވަނަ އަހަރުގެ ޖޫން މަހުގެ 22 ވަނަ ދުވަހު ފަށާފައިވާ ”ގެދޮރުވެރިޔާ“ ސްކީމްގެ ދަށުން މިދިޔަ އަހަރުގެ ނޮވެމްބަރު މަހުގެ 15 ވަނަ ދުވަހު އިއުލާނު ކުރި ފްލެޓް ލިބޭ މީހުންގެ ދާއިމީ ލިސްޓު އެކުލަވައިލުމުގައި ކޮރަޕްޝަނަށް މަގުފަހިވާ ކަންތައްތަކެއް ހުރި ކަމަށް ތުހުމަތުކޮށް، އާއްމު ފަރާތަކުން އޭސީސީއަށް މައްސަލަ ހުށައަޅާފައިވާ ކަމަށެވެ.

އަދި އެމައްސަލައާ ގުޅިގެން، އޭސީސީން ހައުސިން މިނިސްޓްރީއަށް އެންގި ކަންކަން ބެލުމަށް ރައީސުލްޖުމްހޫރިއްޔާގެ ލަފާފުޅާއެކު އެކުލަވައިލި ހައުސިން އެޑްވައިޒަރީ ކޮމިޓީއާއި، ހައުސިން ކޮންސަލްޓޭޓިވް ކޮމިޓީގެ ލަފާގެ މަތިން އެ ސްކީމްގެ ދަށުން ހުށަހެޅި ހުރިހައި ފޯމުތަކެއް މުރާޖައާ ކުރުމުގެ މަސައްކަތް ކުރަމުންދާ ކަމަށް ބަޔާނުގައިވެއެވެ.

“ކުރިން އާއްމު ކުރެވިފައިވާ ”ގެދޮރުވެރިޔާ“ ސްކީމްގެ އުސޫލުގެ ދަށުން ހުށަހަޅާފައިވާ 20،697 (ވިހިހާސް ހަސަތޭކަ ނުވަދިހަ ހަތެއް) އެޕްލިކޭޝަން ފޯމު ބެލުމުގައި ކަށަވަރު ކުރަންޖެހޭ ގިނަ ކަންކަން ހުރުމާ ގުޅިގެން، މި މަސައްކަތްތައް ނިންމުމަށް އިތުރު މުއްދަތު ބޭނުންވާތީވެ، މި ސްކީމްގެ ވަގުތީ ލިސްޓާއި ރީ-އިވެލުއޭޝަނާ ގުޅިގެން ކުރިއަށް ގެންދެވުނު މަސައްކަތްތައް މި މަސައްކަތް ނިމުނުހާ އަވަހަކަށް އާއްމު ކުރާނެ ވާހަކަ މަޢުލޫމާތަށްޓަކައި ދެންނެވީމެވެ.” ހައުސިންގ މިނިސްޓްރީގެ ބަޔާނުގައިވެއެވެ.

ހަމައެއާއެކު މި މަސައްކަތަށް އިތުރު ވަގުތު ނެގިނަމަވެސް ސަރުކާރުގެ މަގްސަދަކީ ގެދޮރުވެރިޔާ ސްކީމުން ފްލެޓް ހޯދުމަށް ހުށަހަޅާފައިވާ އެއްވެސް ފަރާތެއްގެ ހައްގެއް ގެއްލިގެން ނުދާނެކަން ކަށަވަރުކުރުމާއެކު، މިސްކީމުގެ ދަށުން ތަރައްޤީކުރާ ފްލެޓްތައް ދޫކުރެވެނީ ހައްގުވެރިންނަށްކަން ކަށަވަރުކުރުން ކަމަށްވެސް މިނިސްޓްރީން ވަނީ ބުނެފައެވެ.

ގެދޮރުވެރިޔާ ސްކީމްގެ ދަށުން ހުޅުމާލެ ފޭސް 2 ގައި 17 އާއި 18 ބުރީގެ 32 ޓަވަރު އިމާރާތްކުރުމުގެ މަސައްކަތް މިހާރު ދަނީ ކުރަމުންނެެވެ. އޭގެ ކޮންމެ ފްލޯއެއްގައި އަށް އެޕާޓްމެންޓް ހުންނައިރު އޭގެ ތެރޭގައި ދެ ކޮޓަރީގެ 1،200 ފްލެޓާއި ތިން ކޮޓަރީގެ 2،800 ފްލެޓް ހިމެނޭ ކަމަށް ހައުސިން މިނިސްޓްރީ އިން ބުނެއެވެ. އެ ހުރިހާ ޓަވަރެއްގެ މަސައްކަތް ނިމޭނީ އަންނަ އަހަރު މެދުތެރެއަށް ކަމަށް ހައުސިން މިނިސްޓްރީން ވަނީ ހާމަކޮށްފައެވެ.

4000 ފްލެޓްގެ ލިސްޓް އާންމު ކުރާނެ ކަމަށް ބުނެ ކުރީން އެތަައް ތާރީހެއް ދިނުމަށްފަހު ހައުސިން މިނިސްޓަރު ޑރ. އަލީ ހައިދަރު އެންމެފަހުން ދެއްވި ތާރީހު މިއަދަށް ހަމަވާނެ އެވެ.