ކުޑަކުއްޖަކަށް ޖިންސީ ގޯނާ ކުރި މައްސަލައިގައި ޖަލު ހުކުމް ތަންފީޒު ކުރަމުން ދިޔަ އުމުރުން 57 އަހަރުގެ ހާޝިމް އަބޫބަކުރު، ހއ. ހޯރަފުށީ، އަންދަލީބުގެ، ގޭބަންދަށް ބަދަލު ކުރީ ބޭސް ފަރުވާއަށް ކަމަށް މޯލްޑިވްސް ކަރެކްޝަނަލް ސާވިސް އިން ހާމަކޮށްފިއެވެ.

ކަރެކްޝަން ސަރވިސް އިން އިއްޔެ ނެރެފައިވާ ބަޔާނެއްގައި ބުނެފައިވަނީ ހާޝިމަކީ 2022 ވަނަ އަހަރުން ފެށިގެން އުނަގަނޑުގެ މައްސަލައެއް ހުރެ އެ ވޭން ތަހައްމަލު ކުރަމުންދާ މީހެއް ކަމަށެވެ. އެގޮތުން އެކަމުގައި އޭނާއަށް ދޭންޖެހޭ ސިއްހީ ފަރުވާ ޖަލުގައި ބަހައްޓައިގެން ދެވެން ނެތް ކަމަށް ކަރެކްޝަންސުން ވަނީ ބުނެފައެވެ.

ކަރެކްޝަނުން ބުނީ 2022 ނޮވެމްބަރު 20 ގައި ޖަލަށް ލުމަށް ޙުކުމް ކޮށްފައިވާ ޙާޝިމްގެ ބައްޔަށް ޖަލުގައި ފަރުވާ ކުރަމުން ދިޔަ ނަމަވެސް ސާޖަރީއެއް ކުރަން ރާއްޖެއިން ބޭރަށް ދިއުމަށް ޑޮކްޓަރުން ލަފާ ދިނުމާއެކު އޭނާއަށް ރާއްޖެއިން ބޭރަށް ބޭސް ފަރުވާ އަށް ދިއުމަށް ހުއްދަ މީގެ ކުރިން ދީފައިވާކަމަށެވެ.

އެހެންކމުން މިއަހަރުގެ އޮގަސްޓް މަހުގެ 5 ވަނަ ދުވަހު ބޭރަށްގޮސް ފަރުވާ ހޯދުމަށްފަހު ސެޕްޓެމްބަރު މަހުގެ 16 ވަނަ ދުވަހު މާލެ އައި ކަމަށް ކަރެކްޝަންސް އިން މަޢުލޫމާތު ދެއެވެ.

އަދި އޭނާގެ ބަލި ހާލަތު ހުރިގޮތުން ޑޮކްޓަރުން ދީފައިވާ އިރުޝާދާ އެއްގޮތަށް ޖަލުގައި ބަހައްޓައިގެން ފަރުވާ ދެވެން ނެތް ކަމަށާއި އެހެން ކަމުން އޭނާ ވަނީ ހުކުމް ތަންފީޒު ކުރުމަށް ވަގުތީ ގޮތުން ގޭ ބަންދުގައި ބަހައްޓާފައި ކަމަށާއި އޮންނަ އުސޫލާ އެއްގޮތަށް ހާޝިމްގެ ކަންތައްތައް މޮނިޓާ ކޮށް ބަލަމުން ދާކަމަށް ކަރެކްޝަނުން ބުނެފައިވެއެވެ.

އިތުބާރު ހުރި މަގާމެއްގައި ހުރެ ކުޑަކުއްޖަކަށް ޖިންސީ ގޯނާ ކުރުމުގެ ކުށް ސާބިތުވެ ހާޝިމްގެ މައްޗަށް 2022 ނޮވެމްބަރު 20 ގައި ވަނީ 12 އަހަރާއި 5 މަހާއި 18 ދުވަހުގެ ޖަލު ހުކުމެއް އިއްވާފައެވެ. އޭނާގެ ހުކުމް ތަންފީޒް ކޮށް ނިމޭނެ ތާރީހަކީ 2035 މެއި 8 ވަނަ ދުވަހެވެ.