2028 ގެ އެމްޑީޕީ ޕްރައިމަރީގައި ވާދަކުރެއްވުމަށް އެޕާޓީގެ ޗެއަރޕާސަން ފައްޔާޒް އިސްމާޢީލް ނިންމަވައިފިއެވެ.

އެމްޑީޕީގެ ގައުމީ މަޖިލިސް މެންބަރުން ހިމެނޭ ވަޓްސްއެޕް ގްރޫޕެއްގައި ފައްޔާޒު މިއަދު ވިދާޅުވީ 2028ގެ ރިޔާސީ އިންތިހާބުގައި ވާދަކުރަށްވަން ނިންމަވާފައިވާ ކަމަށެވެ. އަދި އެ ކަމުގައި އޭނާއަށް ތާއީދުކޮށްދެއްވުމަށް ވެސް ފައްޔާޒް އެދިވަޑައިގެންފައިވެއެވެ.

ފައްޔާޒް މިއަދު މިކަން އިޢުލާނު ކުރަށްވާފައިވާއިރު މިދިޔަ ހަފްތާގައި ފައްޔާޒު ވިދާޅުވީ ރާއްޖޭގެ ވެރިކަން ކުރެއްވުމުގެ ޝައުގުވެރިކަން ހުރި ނަމަވެސް 2028ގެ އިންތިޚާބުގައި ވާދަކުރުމާމެދު ގޮތެއް ނުނިންމަވާ ކަމަށެވެ.



އެމްޑީޕީގެ ޕްރައިމަރީގައި ވާދަކުރަށްވާނެކަން ފައްޔާޒް އިޢުލާނު ކުރަށްވާފައިވާއިރު ދާދި ފަހުން ކުރީގެ ރައީސް އަދި އެމްޑީޕީގެ އިސް އެޑްވައިޒަރު އިބްރާހިމް މުހައްމަދު ޞާލިޙް ވަނީ އެޕާޓީގެ ރިޔާސީ ޕްރައިމަރީގައި ވާދަކުރައްވަން ގިނަ ބައެއްގެ ޝައުޤު ހުރިކަމަށް ވިދާޅުވެފައެވެ.

އޭގެއިތުރުން 2028 ގެ އިންތިޚާބުގައި ވާދަކުރެއްވުމާ ގޮތުން ނިންމަވާފައިވާ ނިންމެވުން އަދި ހާމަކުރައްވަން ބޭނުންފުޅު ނުވާ ކަމަށާއި، އެމްޑީޕީގެ އިސް ބޭފުޅުންނަށް އެމަނިކުފާނުގެ ނިންމެވުން އެނގިވަޑައިގަންނަވާނެ ކަމަށް ރައީސް ޞާލިޙް ވިދާޅުވެފައިވެއެވެ.

މަޢުލޫމާތު ލިބިފައިވާ ގޮތުގައި އެމްޑީޕީގެ ރިޔާސީ ޕްރައިމަރީގައި ވާދަކުރެއްވުމުގެ ޝައުޤުވެރިކަން ޕާޓީގެ ރައީސް އަބްދުالله ޝާހިދު އާއި އެމްޑީޕީގެ މާލެ ދާއިރާގެ ރައީސް އަދި މާލެ ސިޓީގެ މޭޔަރު އާދަމް އާޒިމް އާއި ކުރީގެ ނައިބު ރައީސް ފައިސަލް ނަސީމް ވެސް ގެންގުޅުއްވައެވެ.