ރައްޔިތުންގެ މަޖިލީހަށް އިންތިހާބުވި ޕާޓީ ބަދަލުކުރުމުން މެންބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ބާތިލުކުރަން ސުޕްރީމްކޯޓަށް ހުށަހަޅައިފި އެވެ.

ގޮނޑި ގެއްލޭ އިސްލާހު ރައްޔިތުންގެ މަޖިލީހުން ފާސްކޮށް ތަސްދީގުކުރީ މިިދިޔަ ބުދަ ދުވަހު އެވެ.

އެހެން ނަމަވެސް ދުވަހުން ދުވަހަށް މަދު ގަޑިއިރުކޮޅެއްގެ ތެރޭގައި އެ އިސްލާހު ފާސްކޮށް ތަސްދީގުކުރުމުން ފާޑުކިއުންތައް އޮތީ އަމާޒުވެފަ އެވެ.

ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެމްބަރު އަލީ ހުސެއިން މިއަދު އެކްސްގައި ވިދާޅުވީ ރާއްޖޭގެ ޖުމްހޫރިއްޔާގެ ގާނޫނުއަސާސީއަށް 6 ވަނަ އިސްލާހު ގެނެސްފައިވަނީ ގާނޫނުއަސާސީގެ 4، 8، 26، 75 އަދި 90 ވަނަ މާއްދާއާ ހިލާފަށް އަދި ގާނޫނުއަސާސީގެ އަސާސީ އޮނިގަނޑާވެސް ހިލާފަށް ކަމަށެވެ.

އެހެންވެ އެ އިސްލާހު ބާތިލުކުރުމަށް އެދި ސުޕްރީމް ކޯޓަށް މައްސަލަ ހުށަހަޅާފައިވާ ކަމަށް އޭނާ ވިދާޅުވި އެވެ.

ނަމަވެސް އޭގެ ތަފްސީލެއް އޭނާ ނުދެއްވަ އެވެ.

ނިމިގެން ދިޔަ އެމްޑީޕީގެ ސަރުކާރުގައި ވެސް ޕާޓީ ބަދަލުކުރުމުން ގޮނޑި ގެއްލޭގޮތަށް އެންޓި ޑިފެކްޝަން ގާނޫނެއް ފާސްކުރި އެވެ. އަދި ރައީސް ޑރ. މުހައްމަދު މުއިއްޒު އެ ގާނޫނު ތަސްދީޤުވެސް ކުރެއްވި އެވެ.

ނަމަވެސް އެގާނޫނު ގާނޫނުއަސާސީއާ ހިލާފުކަމަށް ބުނެ އަމިއްލަ މީހަކު އެ ގާނޫނުގައި ހިމެނޭ މާއްދާތައް ބާތިލުކުރަން ހައިކޯޓަށް ވެސް މި މަހު އޮތީ ހުށަހަޅައިފަ އެވެ.

ގާނޫނު އަސާސީގައި ގޮނޑި ގެއްލޭ މާއްދާ ހިމަނަން ހުށަހެޅީ ހައިކޯޓަށް އެ މައްސަލަ ހުށަހަޅާފައި ވަނިކޮށެވެ.