ގަވާއިދާ ހިލާފަށް ރާއްޖޭގައި އުޅެމުން ދިޔަ 5،000 އަށްވުރެ ގިނަ ބިދޭސީން ޑީޕޯޓުކޮށްލާފައިވާ ކަމަށް އިމިގްރޭޝަނުން ހާމަކޮށްފިއެވެ.

އިމިގްރޭޝަނުން ބުނީ ރާއްޖޭގައި ގަވާއިދާ ހިލާފަށް އުޅެމުންދާ ބިދޭސީން ހޯދުމަށް އެ އިދާރާއިން ހިންގި އޮޕަރޭޝަންތަކުގައި މިހާތަނަށް 5،012 ބިދޭސީން ރާއްޖެއިން ފުރުވާލާފައިވާ ކަމަށާއި 1300އަށް ވުރެ ގިނަ ތަންތަން ބަލައިފާސްކޮށްފައިވާ ކަމަށެވެ.

ޤަވައިދާ ހިލާފަށް އުޅޭ ބިދޭސީންގެ މައްސަލަ ރިޕޯޓް ކުރުމަށް ތައާރަފް ކުރި "އިމިގްރޭޝަން ވޮޗް"އަށް މިހާތަނަށް 900 އަށް ވުރެ ގިނަ މައްސަލަ ހުށަހަޅާފައިވާ ކަމަށް އިމިގްރޭޝަނުން ހާމަކުރެއެވެ.

މައުލޫމާތު ދޭ ފަރާތް ނޭނގޭ ގޮތަށްވެސް ރިޕޯޓް ކުރެވޭ މި ޕްލެޓްފޯމް ލޯންޗު ކުރީ ޖުލައި މަހުގެ 17 ވަނަ ދުވަހުއެވެ. މި ޕްލެޓްފޯމު މެދުވެރިކޮށް ދޭ މައުލޫމާތުގެ ސިއްރު ހިފެހެއްޓޭނެ ކަމަށް އިމިގްރޭޝަނުން ބުނާއިރު އާންމުންގެ އެއްބާރުން ވަރަށް ބޮޑަށް ލިބެމުންދާކަމަށް އިމިގްރޭޝަނުން ހާމަކުރެއެވެ.

ގަވައިދާ ހިލާފަށް އުޅޭ ބިދޭސީން ހޯދުމަށް ހިންގާ އޮޕަރޭޝަންގައި ފުލުހުންވެސް ބައިވެރިވާއިރު މާލެ އާއި ހުޅުމާލޭގައިވެސް މި އޮޕަރޭޝަން ހިންގާފައިވާކަން ފާހަގަ ކުރެވެއެވެ.