ސަރުކާރުގެ ފަރާތުން މަޖިލީހަށް ހުށަހަޅައިފައިވާ އާބަން ޑިވެލޮޕްމަންޓްގެ ބިލު ރައްޔިތުންގެ މަޖިލީހުން މިއަދު ފާސްކޮށްފިއެވެ.

ސަރުކާރުގެ ފަރާތުން ވިލިނގިލީ ދާއިރާގެ މެންބަރު އާޒިމް އަބްދުލްއަޒީޒް ހުށައެޅުއްވި މިބިލު މަޖިލީހުގެ މިއަދުގެ ޖަލްސާގައި ފާސްކޮށްފައިވަނީ ވޯޓުގައި ބައިވެރިވި 70 މެންބަރުންގެ ވޯޓުންނެވެ. މި ބިލު ބަލައިގަތުމާއި ދެކޮޅަށް 11 މެންބަރުން ވޯޓު ދެއްވި އެވެ.

މި ބިލު މަޖިލީހުން ފާސްކޮށްފައިވާއިރު އާބަން ސެންޓަރުތައް ތަރައްޤީކުރާނެ 7 ރަށެއް ސަރުކާރުން މިހާރު ވަނީ އިއުލާންކޮށްފައެވެ. އާބަން ސެންޓަރު ގާއިމުކުރުމަށް ހަމަޖެހިފައިވަނީ ރ. އުނގޫފާރާއި ބ. އޭދަފުއްޓާއި ޅ. ނައިފަރާއި އދ. މަހިބަދޫ އާއި ފ. ނިލަންދޫ އާއި ދ. ކުޑަހުވަދޫ އާއި ލ. ފޮނަދޫގައެވެ.

މިބިލުގައި އާބަން ސަރަހައްދުތައް ކަނޑައެޅުމާއި އާބަން ސަރަހައްދުތައް ތަރައްގީކޮށް ހިންގުމާބެހޭ ޤައުމީ ސިޔާސަތު ކަނޑައަޅާނީ ވަޒީރުންގެ މަޖިލީހުގެ ލަފާގެ މަތިން ރައީސުލްޖުމްހޫރިއްޔާ ކަމަށް ބަޔާން ކޮށްފައިވެއެވެ.

ހަމައެއާއެކު އާބަން ސަރަހައްދުތަކުގެ އޭރިޔާ ޑިވެލޮޕްމަންޓް މާސްޓާ ޕްލޭން ތައްޔާރުކޮށް އެފަދަ ސަރަހައްދުތައް ތަރައްގީކުރާ ފަރާތްތަކަށް ތަރައްގީކުރުމުގެ ހުއްދަތައް ދިނުމާއި އެފަރާތްތަކުން އެ ސަރަހައްދުތަކުގައި ކުރިއަށްގެންދާ ތަރައްގީގެ މަސައްކަތްތައް ވިލަރެސްކުރުމަށްޓަކައި އާބަން ޑިވެެލޮޕްްމަންޓް އޮތޯރިޓީގެ ނަމުގައި އިދާރާއެއް އުފެއްދުމަށްވެސް ހިމަނާފައިވެއެވެ.