ރައްޔިތުން ނުކުމެ އަޑު އުފުލީމާ، ރައީސުލްޖުމްހޫރިއްޔާއަކަށް ހުންނަ ބޭފުޅަކަށް އެ އަޑު އަހަން މަޖުބޫރުވާނެކަމަށް ރައްޔިތުންގެ މަޖިލީހުގެ އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވިދާޅުވެއްޖެއެވެ.

ރޭ އެމްޑީޕީން ބޭއްވި ޖަގަހަ ޖަލްސާގައި ވާހަކަ ދައްކަވަމުން ނާޒިލް ވިދާޅުވީ، ގާނޫނުއަސާސީގެ ދިފާއުގައި އެމްޑީޕީން ޑިސެންބަރު 10 ގައި ބާއްވާ ބޮޑު އެއްވުމުގެ ބޭނުމަކީ ގާނޫނުއަސާސީއަށް މި ސަރުކާރުން ގެނައި ބަދަލުތަކާމެދު ހިތްހަމަ ނުޖެހުން ފާޅުކޮށް ރައްޔިތުންގެ އަޑު އިއްވުން ކަމަށެވެ.

އަދި ރައްޔިތުން ނުކުމެ އަޑު އިއްވީމާ އެ އަޑުއަހަން، ވެރިއަކަށް ހުންނަ މީހަކަށް މަޖުބޫރުވާނެކަމަށް ނާޒިލް ވިދާޅުވިއެވެ.

ނާޒިލް ވިދާޅުވީ ރައްޔިތުން ނުކުމެ އަޑު އިއްވީމަ އެ އަޑުއަހަން މަޖުބޫރުވާކަން ކުރީގެ ރައީސް އިބްރާހީމް މުޙައްމަދު ޞާލިޙާއި އެމަނިކުފާނުގެ ވަޒީރުންނަށް ތަޖުރިބާ ކުރެވިފައިވާނޭކަމަށެވެ.

އެމްޑީޕީން ޑިސެންބަރު 10 ގައި ބާއްވާ ބޮޑު އެއްވުމާއި ގުޅުވައި ނާޒިލް ވިދާޅުވީ، އެމްޑީޕީން ތިބީ ރައްޔިތުންނާއެކު ކަމަށާއި އެފަދަ އެއްވުންތައް އިންތިޒާމުކުރުމުގެ ބޭނުމަކީ ރައްޔިތުންގެ ހައްގުގައި މަސައްކަތް ކުރުން ކަމަށެވެ.

އަދި ރިސޯޓްތަކުގައި މަސައްކަތް ކުރާ މުވައްޒަފުން ވެސް އެ އެއްވުމުގައި ބައިވެރިވާން ގޮވާލައްވަމުން ނާޒިލް ވިދާޅުވީ، ސަރުކާރުން އެ ވަނީ ރިސޯޓް މުވައްޒަފުންނަށް ޑޮލަރުން ދެމުންދިޔަ މުސާރައިގެ ފައިސާކޮޅު ސަރުކާރަށް ނަގަން ފަށާފައިކަމަށެވެ.

މި ޖަލްސާގައި ނާޒިލްގެ އިތުރުން ކުރީގެ ޑިފެންސް މިނިސްޓަރު މާރިޔާ އަޙްމަދު ދީދީ ވެސް ވަނީ އެމްޑީޕީގެ އެއްވުމަށް ދައުވަތު ދެއްވައި، ސަރުކާރާ ދެކޮޅަށް އަޑުއުފުލުމަށް ގޮވާލައްވާފައެވެ.