ކެންސަރަށް ފަރުވާ ހޯދަމުންދާ ބަލިމީހަކަށް ނޭޝަނަލް ސޯޝަލް ޕްރޮޓެކްޝަން އޭޖެންސީ، އެންސްޕާއިން އެހީ ނުދީ ދަތިކުރިކަމަށް ބުނެ މީސްމީޑިއާގައި ދައުރުކުރި ވާހަކަތައް އެންސްޕާއިން ދޮގުކޮށްފިއެވެ.

އެންސްޕާއިން މިއަދު ނެރުނު ބަޔާނެއްގައި ބުނީ މީސްމީޑިއާގައި އެ ވާހަކަތައް ފެތުރި ފަރާތް އެންސްޕާއަށް ގެނެސް، ދެވިފައިވާ އެހީގެ ތަފުސީލުތައް ދައްކާފައިވާ ކަމަށެވެ.

އަދި ​އޭނާގެ ހާޒިރުގައި އެންސްޕާގެ ސިސްޓަމްތަކުން ބެލުމުން، އެ އެހީތައް އެކައުންޓަށް ޖަމާވެފައިވާކަމަށް އޭނާ އެއްބަސްވި ކަމަށާއި އެކްސްގައި ދައުރުކުރި މައުލޫމާތަކީ ސައްހަ މައުލޫމާތު ނޫން ކަމަށް އޭނާ އިއުތިރާފުވެފައި ވާކަމަށް އެ ބަޔާނުގައި ވެއެވެ.

އެންސްޕާއިން ބުނީ، ކެންސަރަށް ފަރުވާ ހޯދަމުންދާ އެ ބަލިމީހާއަށް އެހީ ހަމަޖައްސައިދޭން އެންސްޕާ ވެލްފެއަރއަށް އެދި ހުށަހަޅާފައިވަނީ ޖުމުލަ 9 ފަހަރު ކަމަށެވެ.

އެ 9 ފަހަރު ވެސް އެންސްޕާއިން އަމަލުކޮށްފައިވާ ގޮތުގެ ލޮގް ހިއްސާކުރަމުން އެ އޭޖެންސީން ބުނީ އެ ހުރިހާ ފަހަރެއްގައި ވެސް އެހީ ހަމަޖައްސައިދީފައިވާ ކަމަށެވެ.

އޭގެ އިތުރުން، ​ކުރީ ސަރުކާރުގައި އެ ފަރާތަށް 1000 ޑޮލަރު ލިބެމުންދިޔަ ކަމަށް ޓްވީޓުކުރި ފަރާތުން ބުނެފައި ވާތީ އެކަން ވެސް ބަލާފައިވާނޭ ކަމަށާއި، މިދިޔަ ސަރުކާރުގައި އެ ކޭސް އަވަސްކުރުމުގެ ގޮތުން އާސަންދަ ހިންގުމާ ހަވާލުވެ ހުރި ފަރާތަށް ގުޅާފައި ދެންނެވުމުން އޭފޯ ސައިޒު ގަނޑެއްގައި ސޮއިކުރުވައި 1000 ޑޮލަރު ދިންކަން ހާމަވެފައިވާކަމަށް ބެލިބެލުމުން އެނގިފައިވާ ކަމަށް ވަނީ ބުނެފައެވެ.

އަދި އެއީ އޭރު ނިޒާމުން ބޭރުން ނުގަވާއިދުން ހިންގާފައިވާ އަމަލެއްކަމަށާއި ބަލިމީހާގެ ފަރާތުން އަމިއްލައަށް ނެގި ޓިކެޓުގެ ރިއިމްބާސްމެންޓުގެ ގޮތުގައި ދިން ފައިސާ ފިޔަވައި، ފައިސާގެ ގޮތުގައި އޭގެ ކުރިން ވެސް ދީފައިވަނީ 200 ޑޮލަރާއި 250 ޑޮލަރަށްވާ ދިވެހި ރުފިޔާކަމަށް ވެސް އެންސްޕާގެ ބަޔާނުގައި ބުނެފައިވެއެވެ.

މި މައްސަލާގައި އެންސްޕާ ހިންގުމާއި ހަވާލުވެ ހުންނެވި ހީނާ ވަލީދު ވަނީ އެފަދައިން ބަސް ބުނުމުގެ މިނިވަންކަން ރާއްޖޭގައި ހުޅުވާލެވިފައި އޮތްނަމަވެސް އެފަދަ ދޮގުވާހަކަތައް ނުފެތުރުމަށް ގޮވާލައްވާފައެވެ.