ހައްޖު ކޯޕަރޭޝަނުން ގެސްޓު ހައުސް ހިންގުމަކީ ރަނގަޅުކަމެއް ނޫން ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ.

މިނިސްޓަރު އެފަދައިން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ވެލިދޫ ދާއިރާގެ މެމްބަރު މުހައްމަދު އައްބާސް ކުރެއްވި ސުވާލަކަށް ޖަވާބު ދެއްވަމުން ނެވެ.

އެގޮތުން ހައްޖު ކޯޕަރޭޝަނުން ގެސްޓު ހައުސް ވިޔަފާރިއަށް ވަނުމުން ނިކުންނާނެ ނަތީޖާއާ ގުޅޭ ގޮތުން އައްބާސްވަނީ ސުވާލުކުރައްވައިފަ އެވެ.

އެ ސުވާލަަށް ޖަވާބު ދެއްވައި މިނިސްޓަރު ވިދާޅުވީ ގެސްޓުހައުސް ހިންގަން ހައްޖު ކޯޕަރޭޝަނުން މަސައްކަތް ކުރުން އެއީ އޭގެ ޒާތުގައި ކުންފުނީގެ ބޯޑުންނާއި ކުންފުނީގެ ހިއްސާދާރުން ވިސްނަން ޖެހޭ ކަމެއް މަށެވެ.

ހަމަ އެހެންމެ ހައްޖު ކޯޕަރޭޝަންގައި އިތުރުވާ ފަންޑު ހުރިނަމަ ސްޕެޝަލިސްޓުންނާ ހަވާލުކޮށްގެން އެ ފަންޑު މެނޭޖުކުރުމުގެ ކަންކަން ކުުރިއަށް ގެންގޮސްފިނަމަ އޭގެ ނަތީޖާ ރަނގަޅުވާނެ ކަމަށް ވެސް މިނިސްޓަރު ވިދާޅުވި އެވެ.

"މިސާލަކަށް ޓޫރިޒަމްއަށް އިންވެސްޓުކުރާ ކަމަށްވާ ނަމަ، ކުރެވޭނެ ކުންފުނި އެބަހުރި ސަރުކާރުގައި. އެހެންވީމަ ހުރިހާ ކުންފުނިތަކުން، އެޗްޑީސީ، ހައްޖު ކޯޕަރޭޝަންއާ ނޫނީ ފެނަކަ އެންމެން ގެސްޓުހައުސް އާއި ރިސޯޓު ހެދީމަ އަޅުގަނޑަށް ހީވަނީ އޭގެ ނަތީޖާ ރަނގަޅެއް ނުވާނެހެން،"މިނިސްޓަރު ވިދާޅުވި އެވެ.

ހައްޖު ކޯޕަރޭޝަނުން ނިންމާފައިވަނީ ކ. މާފުށީގައި ސިޓީ ހޮޓަލެއް އަޅައި ހަލާލު ޓޫރިޒަމް ފެށުމަށެވެ.

އެ ކޯޕަރޭޝަނުން ބުނީ އެ ނިންމުން ނިންމީ ބޭރު ފައިސާ ލިބުމުގެ މައްސަލަ ހައްލުކުރުމުގެ ގޮތުން ކަމަށެވެ.