މޯލްޑިވްސް ރިޓަޔަމަންޓް ޕެންޝަން ސްކީމް ފަންޑުގެ ޖުމްލަ ޢަދަދު 24.3 ބިލިއަން ރުފިޔާ އަށް އަރައިފިއެވެ.

ޕެންޝަން އޮފީހުގެ ތަފާސް ހިސާބުތައް ދައްކާގޮތުން މިއަހަރުގެ އޮކްޓޯބަރުގެ ނިޔަލަށް ޕެންޝަން ފަންޑުގެ ޖުމްލަ ޢަދަދަކީ 24.3 ބިލިއަން ރުފިޔާއެވެ. އޭގެ ތެރެއިން 15.2 ބިލިއަން ރުފިޔާ އަކީ ޕެންޝަން ފަންޑުގެ މެމްބަރުންގެ ފަރާތުން ފަންޑަށް ޖަމާކުރި ޢަދަދެވެ. އަދި ބާކީ 9.1 ބިލިއަން ރުފިޔާއަކީ ފަންޑުން ކޮށްފައިވާ އިންވެސްޓްމަންޓްތަކުން ލިބިފައިވާ ފައިދާއެވެ.

ތަފާސްހިސާބުތައް ދައްކާގޮތުން މޯލްޑިވްސް ރިޓަޔަމަންޓް ޕެންޝަން ސްކީމްގެ މެމްބަރުންގެ އަދަދު މިހާރު 190،458 އަރައެވެ. އޭގެ ތެރެއިން ފަންޑަށް ފައިސާ ޖަމާކުރަމުންދާ ފަރާތްތަކުގެ އަދަދަކީ 181،901 އެވެ.

ފަންޑަށް ފައިސާ ޖަމާކުރާ ސަރުކާރު މުއައްޒަފުންގެ އަދަދު 51،393 އުޅޭއިރު، އެސްއޯއީތަކަށް ނިސްބަތްވާ މުއައްޒަފުންގެ އަދަދަކީ 31،861 އެވެ. އަދި 47،094 މުއައްޒަފުންނަކީ އަމިއްލަ ކުންފުނިތަކުގެ މުއައްޒަފުންނެވެ.

މޯލްޑިވްސް ރިޓަޔަރމަންޓް ޕެންޝަން ސްކީމް (އެމް.އާރް.ޕީ.އެސް) އަކީ ދިވެހިރާއްޖޭގެ ޕެންޝަނާ ބެހޭ ގާނޫނުގެ ދަށުން ތައާރަފު ކުރެވިފައިވާ ޑިފައިންޑް ކޮންޓްރިބިއުޝަން (ޑީސީ) ޕެންޝަން ސްކީމެކެވެ. ޑިފައިންޑް ކޮންޓްރިބިއުޝަން ޕެންޝަން ނިޒާމަކީ، ވަޒީފާދޭ ފަރާތާއި ވަޒީފާ އަދާކުރާ ފަރާތުން ކަނޑައެޅިފައިވާ ވަކި އަދަދަކަށް ސްކީމަށް ފައިސާ ދައްކައި، އެ ފައިސާ އިންވެސްޓް ކޮށްގެން ރިޓަޔަރމަންޓަށް ފައިސާ ރައްކާކުރެވޭ ޕެންޝަން ނިޒާމެކެވެ.

އެގޮތުން އެމް.އާރް.ޕީ.އެސްގެ މައިގަނޑު އަމާޒަކީ މަސައްކަތްތެރިން ވަޒީފާއަދާކުރާ މުއްދަތުގައި ފަހަށް ފައިސާ ރައްކާކޮށް ރިޓަޔަރމަންޓަށްފަހު ކަނޑައެޅޭ އާމްދަނީއެއް ލިބޭނެ މަގުފަހިކުރުމެވެ. ވަޒީފާދޭ ފަރާތުންނާއި ވަޒީފާއަދާކުރާ ފަރާތުން ޕެންޝަން ކޮންޓްރިބިއުޝަންގެ ގޮތުގައި ކޮންމެ މަހަކު ސްކީމަށް ދައްކަނީ މުވައްޒަފުގެ އަސާސީ މުސާރައިގެ 7 އިންސައްތަ އެވެ. އެއީ ދެފަރާތުން އެއްކޮށް ޖުމްލަ 14 އިންސައްތަ އެވެ.

ޤާނޫނު ބުނާގޮތުން މިފަދަ އެހެން ޕެންޝަން ނިޒާމުތަކެކޭ އެއްފަދައިން އެމް.އާރް.ޕީ.އެސް އިން ޕެންޝަންގެ ގޮތުގައި ލިބޭނެ މިންވަރު ބިނާވާނީ، ޕެންޝަން ލިބޭ އުމުރު ހަމަވާއިރު އެމީހެއްގެ ރިޓަޔަރމަންޓް ސޭވިންގްސްގެ ގޮތުގައި ޖަމާވެފައި ހުރި އަދަދެއްގެ މައްޗަށެވެ.