ފުރާނައަށް ނުރައްކާވާފަދަ ވިހަގަދަ ބޮއްޔެއްކަމަށްވާ ކޯން ސްނެއިލް، މާލޭ ރަސްފަންނުން ފެންނާތީ ސަމާލުވާން އިލްތިމާސް ކޮށްފިއެވެ.

އޯޝަނޯހޯލިކް މޯލްޑިވްސްއިން ވެނޮމަސް ކޯން ސްނެއިލްގެ ވީޑިއޯއަކާއެކު އިއްޔެ މީސްމީޑިއާގައި އާންމުކުރި ވީޑިއޯއެއްގައި ބުނެފައިވަނީ ރަސްފަންނުން ފެންނަމުންދާ ވެނޮމަސް ކޯން ސްނެއިލަކީ ވަރަށް ވިހަގަދަ އަދި ބައެއް ފަހަރު ފުރާނައަށް ވެސް ނުރައްކާވާފަދަ އެއްޗެއް ކަމަށެވެ.

އަދި އެވައްތަރުގެ ބޮލި އާންމުކޮށް ފެންނަނީ ހަވީރާއި ރޭގަނޑުގެ ވަގުތުގައި ކަމަށް އެ ޖަމިއްޔާއިން ބުނެފައިވެއެވެ.



އެހެންކަމުން އެ ވަގުތުތަކުގައި ރަސްފަންނަށް މޫދަށް އެރިއުޅޭ މީހުންނާއި ކުޑަކުދިން އެކަމަށް ސަމާލުވުމަށާއި ހުސްފައިގައި ރަސްފަންނު މޫދުގައި ނޫޅުމަށް އޯޝަނޯހޯލިކް މޯލްޑިވްސްއިން ވަނީ އިލްތިމާސް ކޮށްފައެވެ.

ދިރާސާތަކުން ދައްކާގޮތުން ވެނޮމަސް ކޯންސްނެއިލުން ދޫކުރާ ވިހައިގެ ސަބަބުން ކުޑަ ވަގުތުކޮޅެއްގެ ތެރޭގައި އިންސާނާ ވާގިނެތުމާއި، ހާޓްއެޓޭކެއް ޖެހުމާއި ކުއްލި ގޮތަކަށް މަރުވުންފަދަ ޙާދިސާތައް މެދުވެރިވެއެވެ.