ސަރުކާރުގެ ވުޒާރާތަކެއް ހިންގާ މ. ގްރީން ބިލްޑިންގ ގައި އަލިފާން ރޯވުމާ ގުޅިގެން އެ ސަރަހައްދަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަޑައިގެންފިއެވެ.

ރައީސް މުޢިއްޒުގެ އަރިހުގައި ދިފާޢީ ވަޒީރު މުހައްމަދު ޣައްސާން މައުމޫނާއި ޢިމާރާތްކުރުމާއި ބިނާރާބެހޭ ވަޒީރު ޑރ. ޢަބްދުالله މުއްޠަލިބުވެސް އެސަރަޙައްދުގައި ގެންދަވަނީ ޙަރަކާތްތެރިވެ ވަޑައިގަންނަވަމުންނެވެ. އޭގެ އިތުރުން ސަރުކާރުގެ އެހެނިހެން ވުޒާރާތަކުގެ ވަޒީރުންވެސް އެ ސަރަޙައްދުގައި އެބަ ތިއްބެވިއެވެ.

މިއަދު ހެނދުނު ރޯވި މި އަލިފާނާ ގުޅިގެން މ. ގްރީން ބިލްޑިންގ ގައި ޓިނުން ހަދާފައިވާ ޢިމާރާތް މިހާރުވަނީ ގާތްގަނޑަކަށް އަނދާ ހުލިވެފައެވެ.

ޤައުމީ ދިފާއީ ބާރުން ބުނީ މ. ގްރީން ބިލްޑިންގ ގައި ރޯވެފައިވާ އަލިފާން އަދިވެސް ކޮންޓްރޯލް ކުރެވިފައި ނުވާ ކަމަށާއި އަލިފާން ރޯވެފައިވާ އިމާރާތާ ކައިރި ހިސާބުތަކުގައި މީހުން ދިރިއުޅޭ ގެތަކުން މިހާރު ވަނީ މީހުން ހުސްކުރެވިފައި ކަމަށެވެ.

Housing Ministry building gai alifaanuge haadhisaa eh hin'gaifi pic.twitter.com/DIcWVMAqCj

— Accidents in Maldives (@AccidentsMV) December 12, 2024

އޭގެ އިތުރުން އެހެން އިމާރާތްތަކަށް އަލިފާން ފެތުރުމުގެ ކުރިން އަލިފާންގަނޑު އެއްކޮށް ކޮންޓްރޯލް ކުރުމުގެ މަސައްކަތް ދަނީ ކުރަމުން ކަމަށް ޤައުމީ ދިފާއީ ބާރުން މަޢުލޫމާތުދެއެވެ.

ހަމައެއާއެކު ވެލާނާ އިންޓަނޭޝަނަލް އެއަރޕޯޓްގެ ފަޔަރފައިޓަރުން ވެސް މިހާރު ދަނީ އަލިފާން ކޮންޓްރޯލް ކުރުމުގައި ހަރަކާތްތެރިވަމުންނެވެ.

އަލިފާން ރޯވެފައިވާ މ. ގްރީން ބިލްޑިންގ އަކީ ގެދޮރުވެރިކަމާއި ބިމާއި ޢުމްރާނީ ތަރައްޤީއާ ބެހޭ ވުޒާރާ އާއި ޢިމާރާތްކުރުމާއި ބިނާރާ ބެހޭ ވުޒާރާ ހިންގާ ޢިމާރާތެވެ.