މުހިއްމު މަސައްކަތްތަކެއް ނިންމައި ރައްޔިތުންގެ މަޖިލީހުގެ މިއަހަރުގެ ފަހު ދައުރު ނިންމާލައިފިއެވެ.

މިއަދުގެ ޖަލްސާ ނިންމާލައްވަމުން މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ މި ދައުރު މަޖިލީހަށް ހުށަހެޅި މަސައްކަތްތަކުގެ ތެރެއިން 73.3 އިންސައްތަ މަސައްކަތް ނިންމާފައިވާ ކަމަށެވެ.

މަޖިލީހުގެ މިއަހަރުގެ ފަހު ދައުރުގައި 27 ޖަލްސާ ބާއްވާފައިވާއިރު، ކޮމިޓީތަކުން 165 ބައްދަލުވުމެއް ބާއްވާފައިވެއެވެ. މިދައުރުގައި މަޖިލީހަށް 20 ބިލެއް ހުށަހަޅައި، 4 ކުއްލި މައްސަލައަކަށް ބަހުސްކޮށް އިތުރު 20 މައްސަލައެއްގެ މަސައްކަތްތައް ކޮށްފައިވެއެވެ.

އޭގެ އިތުރުން އެއް ގަރާރުގެ މަސައްކަތާއި ރިޔާސަތުން ހުށަހެޅި ފަސް މައްސަލަ މަޖިލީހުން ކުރިއަށް ގެންގޮސްފައިވެއެވެ. ހަމައެއާއެކު ވަޒީރުންނާ 13 ސުވާލު ކޮށްފައިވާ ކަމަށް އަބްދުއްރަހީމް މިއަދު ވިދާޅުވެފައިވެއެވެ.

“މަޖިލީހުގެ ޖަލްސާތަކުގައި ޖުމްލަ 67 ގަޑިއިރު ހޭދަވެފައިވޭ. ކޮމިޓީތަކުގެ ބައްދަލުވުންތަކުގައި 118 ގަޑިއިރު ހޭދަވެފައިވޭ." އަބްދުއްރަހީމް ވިދާޅުވިއެވެ.

މަޖިލީހުގެ އާ ދައުރު ދެން ފަށާނީ އަންނަ ފެބުރުއަރީ މަހުއެވެ. މަޖިލީހުގެ ގަވައިދު ބުނާ ގޮތުން މަޖިލީހުގެ ޖަލްސާތައް ބެހިގެން ދާނީ އަހަރުގެ ތިން ދައުރަކަށެވެ.

އެގޮތުން ފުރަތަމަ ދައުރު ދެމިގެންދަނީ 1 ފެބްރުއަރީން 15 މޭގެ ނިޔަލަށެވެ. އަދި ދެވަނަ ދައުރު 1 ޖޫން އިން 15 އޮގަސްޓްގެ ނިޔަލަށް ކުރިޔަށް ދާއިރު ތިން ވަނަ ދައުރު ދެމިގެންދަނީ 1 އޮކްޓޫބަރުން ނޮވެމްބަރުގެ ނިޔަލަށެވެ.