މި ސަރުުކާރުން ދޭން ނިންމާފައިވާ ބަދަލު ކުރީގެ 10 އަހަރު ދީފައިވާ ބަދަލާ ނުބައްދަލު ކަމަށް އެމްޑީޕީގެ ޕީޖީ ލީޑަރު އިބްރާހިމް ނާޒިލް ވިދާޅުވެއްޖެ އެވެ.

ނިމިގެން ދިޔަ ސަރުކާރުގައި އެކި ކުންފުނިތަކަށް ބަދަލުގެ ގޮތުގައި ދިން ފައިސާގެ މަައްސަލަތަކާ ގުޅިގެން ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލާއި ކުރީގެ ރައީސް އިބްރާހިމް މުހައްމަދު ސޯލިހުގެ އިތުރުން ރައީސް އޮފީހުގެ ކުރީގެ މިނިސްޓަރު އަލީ ޝިޔާމްގެ މައްޗަށް ޖިނާއީ ތަހުގީގެއް ހިންގަން ލަފާދޭން ވެރިކަން ކުރާ ޕީއެންސީގެ މެޖޯރިޓީ އޮންނަ މަޖިލީހުން ނިމިގެން ދިޔަ ހަފްތާގައި ވަނީ ފާސްކޮށްފަ އެވެ.

އެމްޑީޕީން ރޭ ބޭއްވި ޖަލްސާގައި އެކަމަށް އިޝާރާތްކުރައްވައި ނާޒިލް ވިދާޅުވީ ނިމިގެން ދިޔަ ސަރުކާރުގައި ދީފައި އޮތް ބަދަލެއް ދީފައި އޮތީ މާލިއްޔަތު ކޮމިޓީން މައްސަލަތައް ބަލައި އެކުލަވާލި ރިޕޯޓް ފާސްކުރުމުން ރައީސް އިބްރާހިމް މުހައްމަދު ސޯލިހު އުފެއްދެވި ކޮމިޓީން ކަންކަން ފާސްކޮށް އޭގެ ފަހުން ވަޒީރުންގެ މަޖިލީހުން ވެސް ފާސްކޮށްގެން ކަމަށެވެ. އަދި އެ ނޫން ގޮތަކަށް ލޯ ލާރިއެއް ވެސް ދީފައި ނޯންނާނެ ކަމަށް ނާޒިލް ވިދާޅުވި އެވެ.

އެހެން ނަމަވެސް މި ސަރުކާރުން ވެރިކަމަށް އައުމަށް ފަހު މެލޭޝިއާގެ ކުންފުންޏަކަކަށް ބަދަލުގެ ގޮތުގައި 6.9 ބިލިއަން ރުފިޔާ ދޭން ނިންމައި އެ ކުންފުންޏާއެކު ކޮންޓްރެކްޓް ހަދާފައިވާ ކަމަށް ނާޒިލް ވިދާޅުވި އެވެ.

ނާޒިލް އެ އިޝާރާތް ކުރެއްވީ އެކްސްޕެޓް ސިސްޓަމްއެއް ގާއިމުކުރަން މެލޭޝިއާގެ ބެސްޓިނެޓްއާއެކު ވެފައިވާ އެއްބަސްވުމަށެވެ. ނަމަވެސް އެ ނިންމުމަކީ މި ސަރުކާރުގެ ނިންމުމެއް ނޫން ކަމަށް ސަރުކާރުން ބުނެއެވެ.

"ކުރީގައި ދީފައި ހުރި ހުރިހާ ބަދަލެއް އެއްކޮށްލީމަ، އެކި ދުވަސްވަރުގައި 10 އަހަރު ވަންދެން ދީފައި ހުރި ބަދަލުތަކެއް ވިޔަސް، އެ ހުރިހާ އެއްޗެއް އެއްކޮށްލީމަ ވެސް މި ބުނާ 6.9 ބިލިއަން ރުފިޔާއާ ހިސާބަށް މިވީތަނަށް ނެތް ބަދަލު ދެވިފަކާއެއް،" އޭނާ ވިދާޅުވި އެވެ.

ނާޒިލް އިތުރަށް ވިދާޅުވީ އެހާ ބޮޑު ބަދަލެއް މެލޭޝިއާގެ ކުންފުންޏަށް ދޭއިރު އެއީ ރައްޔިތުންގެ ފައިސާ ކަމަށެވެ.