ޗުއްޓީއާ ދިމާކޮށް މޯލްޑިވިއަންގެ ފްލައިޓްތައް އިތުރުކުރަން ނިންމައިފި އެވެ.

މޯލްޑިވިއަނުން މިއަދު އެެކްސްގައި ކުރި ޕޯސްޓެއްގައި ވަނީ ފްލައިޓް އިތުރުކުރަން ނިންމި މަންޒިލްތައް ހާމަކޮށްފަ އެވެ.

އޭގެ ތެރޭގައި މޯލްޑިވިއަނުން ރާއްޖޭގައި ދަތުރުކުރާ ހުރިހާ މަންޒިލްތަކެއްހެން ހިމެނެ އެވެ.

އެގޮތުން މާދަމާއިން ފެށިގެން ބުދައާ ހަމައަށް ކޮންމެ ދުވަހަކު ފުވައްމުލަކަށް އިތުރު ފްލައިޓްތައް ބާއްވާ އިރު މާދަމާއާއި ބުދަ ދުވަހު ހއ. ހޯރަފުއްޓަށް ވެސް ކޮންމެ ދުވަހަކު އިތުރު އެއް ފްލައިޓް ބާއްވާނެ އެވެ.

އަދި ސ. ގަމަށް މާދަމާ އިތުރު ފްލައިޓެއް ބާއްވާ އިރު މި މަހުގެ 18 އަދި 19 ގައި ކޮންމެ ދުވަހަކު އިތުރު ދެ ފްލައިޓް އޮންނާނެ އެވެ.

އޭގެ އިތުރުން ކުޅުދުއްފުށި ސިޓީއަށް ވެސް އަންގާރަ ދުވަހު އިތުރު އެއް ފްލައިޓް ބާއްވާނެ އެވެ.

ދެން އިތުރު ފްލައިޓްތައް ބާއްވާ މަންޒިލްތަކުގެ ތެރޭގައި ބ. ދަރަވަންދޫ، ލ. ކައްދޫ، ށ. ފުނަދޫ، ލ.މާވަރުލު، ހދ. ހަނިމާދޫ. ގދ. ފަރެސްމާތޮޑާ ހިމެނެ އެވެ.