ވޭޕްގެ މައްސަލަތަކާ ގުޅޭ ޖޫރިމަނާތަކުގެ މައުލޫމާތު ފޮނުވާނީ އެސްއެމްއެސް މެދުވެރިކޮށްކަމަށް ފުލުހުން ބުނެފި އެވެ.

ދުންފަތް ކޮންޓްރޯލްކުރުމުގެ ގާނޫނުގެ ދަށުން ވޭޕްއާ ގުޅޭ ތަކެތި އެތެރެކުރުން، ބޭނުންކުރުން އަދި ބެހުންވެސް މިދިޔަ އާދިއްތަ ދުވަހުން ފެށިގެން މަނާވިއިރު ފުލުހުން ރޭ ބުނީ އެ ގަވައިދު ތަންފީޒުކުރަން ފަށާފައިވާ ކަމަށެވެ.

ފުލުހުން ރޭ ނެރުނު ނޫސް ބަޔާނުގައި ބުނީ ވޭޕްގެ މައްސަލަތަކުގައި ޖޫރިމަނާ ކުރެވޭ ފަރާތްތަކަށް އެކަމުގެ މައުލޫމާތު މޯބައިލް ފޯނުގެ ޒަރިއްޔާއިން ކުރު މެސެޖެއް މެދުވެރިކޮށް ފޮނުވާނެ ކަމަށެވެ. އަދި އެ މެސެޖުގައި، ޖޫރިމަނާ ދެއްކުމަށް ވާރު ޕޭގެ ޕޭމަންޓް ލިންކެއް ވެސް ހިމެނޭނެ ކަމަށް ވެސް ފުލުހުން ބުނެފައި ވެއެވެ.

އެހެންކަމުން ދުންފަތް ކޮންޓްރޯލުކުރުމާބެހޭ ގާނޫނަށް ގެނެވުނު އިސްލާހަށް ހުރިހާ ފަރާތްތަކުންވެސް ފުރިހަމައަށް އަމަލުކޮށް އެ ގާނޫނު ތަންފީޒުކުރުމަށް ފުލުހުންނަށް ފުރިހަމަ އެއްބާރުލުން ދިނުމަށް ވެސް ވަނީ އިލްތިމާސްކޮށްފަ އެވެ.

"އަޅުގަނޑުމެން އެންމެންގެ ވެސް އަމާޒަކަށް ވާންވާނީ ދުންފަތުގެ އިސްތިއުމާލުކުރުމުން ދުރުހެލިވެފައިވާ ދުޅަހެޔޮ މުޖުތަމައެއް ބިނާކުރުމެވެ." ފުލުހުން ނެރުނު ނޫސް ބަޔާނުގައި ބުނެފައި ވެއެވެ.

ވޭޕްކުރުން މަނާކޮށް ގާނޫނަށް ގެނައި އިސްލާހުތަކުގައި އެފަދަ މައްސަލަތަކުގައި ބޮޑެތި ޖޫރިމަނާތައް ހިމެނެ އެވެ.