ވޭޕްކޮށްގެން ފުރަތަމަ ފަހަރަށް ހަތަރު މީހަކު ޖޫރިމަނާކޮށްފި އެވެ.

ދުންފަތް ކޮންޓްރޯލްކުރުމުގެ ގާނޫނުގެ ދަށުން ވޭޕާ ގުޅޭ ތަކެތި އެތެރެކުރުން، ބޭނުންކުރުން އަދި ބެހުންވެސް މިދިޔަ އާދިއްތަ ދުވަހުން ފެށިގެން އޮތީ މަނާވެފަ އެވެ.

އޭގެ ފަހުން ފުލުހުން މިއަދު މީޑިއާތަކަށް ފޮނުވި މެސެޖުގައި ބުނީ ގާާނޫނަށް ގެނައި އިސްލާޙުތައް ތަންފީޒުކުރަން ފެށިފަހުން މި މަހުގެ 17 ވަނަ ދުވަހާ ހަމައަށް ހަތަރު ފަރާތެއް ޖޫރިމަނާކޮށްފައިވާ ކަމަށެވެ. އެއީ ޖުމްލަ 20،000 ރުފިޔާާއިން ކަމަށް ވެސް ފުލުހުން ބުނެފައި ވެއެވެ.

ދުންފަތް ކޮންޓްރޯލް ކުރުމުގެ ގާނޫނުގެ ދަށުން އިލެކްޓްރޯނިކް ސިނގިރެޓާއި އަދި އެފަދަ ވޭޕްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ބޭނުންކުރާ ފަރާތްތައް 5،000 ރުފިޔާއިން ޖޫރިމަނާކުރެވެ އެވެ.

ވޭޕްގެ މައްސަލަތަކުގައި ޖޫރިމަނާ ކުރެވޭ ފަރާތްތަކަށް އެކަމުގެ މައުލޫމާތު ފޮނުވަނީ ކުރު އެސްއެމްއެސްއަކުން ނެވެ. އަދި އެ މެސެޖުގައި، ޖޫރިމަނާ ދެއްކުމަށް ވާރު ޕޭގެ ޕޭމަންޓް ލިންކެއް ވެސް ފޮނުވަ އެވެ.

ދުންފަތް ކޮންޓްރޯލް ކުރުމުގެ ގާނޫނުގެ ދަށުން އެ ގާނޫނުގެ އެކި މާއްދާތަކާ ހިލާފުވެއްޖެނަމަ 50،000 ރުފިޔާއާ ހަމައަށް ޖޫރިމަނާކުރެވެ އެވެ.