ނިރުބަވެރި އިސްރާއީލުގެ ދިފާއުގައި އެމެރިކާގެ އަސްކަރިއްޔާއިން ޔަމަނަށް ހަމަލާ ދޭން އަނެއްކާވެސް ފަށައިފިއެވެ.

އަބަދުވެސް އިސްރާއީލަށް ވާގިވެރިވާ އެމެރިކާއިން ބުނީ އެގައުމުގެ އަސްކަރިއްޔާއިން މިހާރު ހަމަލާދެނީ ޔަމަނުގެ ވެރިރަށް ސަނާގައި ހަރަކާތްތެރިވާ ހޫތީންނަށް ކަމަށެވެ. އެގޮތުން ހޫތީންނާ ގުޅުން ހުރި ގިނަ އަމާޒުތަކަށް ވައިގެ ހަމަލާތަކެއް ދީފައިވާއިރު، އޭގެ ތެރޭގައި މިސައިލް ރައްކާކުރާ ތަނަކާއި "ކޮމާންޑް އެންޑް ކޮންޓްރޯލް" ސައިޓެއް ހިމެނެ އެވެ.

މެދުއިރުމަތީގައި އެމެރިކާ ސިފައިންގެ އޮޕަރޭޝަންތައް ބަލަހައްޓާ އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ހޮނިހިރު ދުވަހު ބުނެފައި ވަނީ މި ހަމަލާތަކުގެ މަގުސަދަކީ ހޫތީގެ އޮޕަރޭޝަންތަކަށް ބުރޫއެރުވުން ކަމަށެވެ.

ޣައްޒާގެ ދިފާއުގައި ހޫތީންވެސް ދަނީ އެމެރިކާއަށާއި އިސްރާއީލަށް ހަމަލާދެމުންނެވެ. އެގޮތުން އިސްރާއީލަށް ސީދާ ހަމަލާތައް ދެމުންދާއިރު އެމެރިކާއަށް ދޭ ހަމަލާތައް އަމާޒުކުރަނީ އެގައުމުގެ މަނަވަރުތަކަށެވެ.

އީރާނާވެސް ގުޅިފައިވާ ހޫތީ ޖަމާއަތުން މީގެ ކުރިން ވަނީ ރަތް ކަނޑާއި ބާބު އަލް މަންޑޭބް އަދި ގަލްފް އޮފް އޭޑެންއިން ދަތުރުކުރި އެމެރިކާގެ ނޭވީ އާއި ވިޔަފާރި އުޅަނދުތަކަށް ހަމަލާދީފައެވެ. މިކަން ސެންޓްކޮމްއިންވެސް ވަނީ ކަށަވަރުކޮށްދީފައެވެ.

އެމެރިކާއިން ހޫތީންނަށް މި ހަމަލާތައް ދީފައިވަނީ މި ހަފްތާގައި ހޫޘީންނާއި އިސްރާއީލުގެ އަސްކަރިއްޔާއާ ދެމެދު ހަމަލާތައް އިތުރުވެފައިވާ ދަނޑިވަޅެއްގައެވެ.