ކުރީ ސަރުކާރުން ބަދަލުދިން މައްސަލަތަކާ ގުޅޭ ތަހުގީގެއް ހިންގަން ޕްރޮސިކުއުޓާ ޖެނެރަލް އައްބާސް ޝަރީފް އަންގަވައިފިއެވެ.

ޕީޖީ އޮފީހުން މިއަދު ބުނީ ނިމިދިޔަ ސަރުކާރުގެ ދުވަސްވަރު ދައުލަތުން އެކި ފަރާތްތަކަށް ބަދަލުގެ ގޮތުގައި ދީފައިވާ ފައިސާއާގުޅޭ މައްސަލަ ރައްޔިތުންގެ މަޖިލީހުގެ މާލިއްޔަތު ކޮމިޓީން ދިރާސާކުރެއްވުމަށްފަހު އެ ކޮމިޓީއަށް ފާހަގަވާ ކަންކަމުގެ ރިޕޯޓު އެ އޮފީހަށް ހުށަހަޅާފައިވާ ކަމަށެވެ.

ޕީޖީން ބުނީ އެ ރިޕޯޓުގައި، ދައުލަތުގެ އިސް މަގާމުތަކެއް އަދާކުރައްވާފައިވާ ބައެއްގެ މައްޗަށް ދައުލަތުގެ ފައިސާއާއި މުދާ، އެ ތަކެތީގެ ޙައްޤުވެރިން ފިޔަވައި އެހެން ފަރާތްތަކަށް ލިއްބައިދީ، އަދި ލިއްބައިދިނުމަށް މަސައްކަތްކޮށްފައިވާކަމަށް ތުހުމަތުކުރެވޭކަމަށް ބަޔާންކޮށްފައިވާ ކަމަށެވެ.

އަދި މިކަމުގައި ދައުލަތުގެ މުވައްޒަފުންތަކެއް ރަސްމީ ވާޖިބުތަކާ ހިލާފަށް، އަދި ދައުލަތަށް ގެއްލުންލިބޭ ގޮތަށް އަމަލުކޮށްފައިވާކަމަށް ތުހުމަތުކުރެވޭ ކަންތައްތަކެއް ރިޕޯޓުގައި ފާހަގަކޮށްފައިވާ ކަމަށް ވެސް ޕީޖީ އޮފީހުން ބުނެފައި ވެއެވެ.

އެހެންވެ އެ ރިޕޯޓުގައި ފާހަަގަކޮށްފައިވާ ކަންކަމާ ގުޅޭ ގޮތުން ޖިނާއީ ތަހުގީގެއް ހިންގަން މިދިޔަ އަންގާރަ ދުވަހު އޭސީސީއަށް އަންގާފައިވާ ކަަމަށް ވެސް ޕީޖީން ބުނެފައި ވެއެވެ.

"އަދި މައްސަލައިގެ އަވަސް ތަހުގީގެއް ހިންގުމަށާއި، ތަހުގީގަށް ކުރިއެރުން ލިބެމުންދާ ވަރަކުން މި އޮފީހާ މަޝްވަރާކުރަމުން ގެންދިއުމަށް އެ ކޮމިޝަންގައި ދަންނަވާފައިވާނެއެވެ." ޕީޖީން މިއަދު ނެރުނު ބަޔާނުގައި ބުނެފައި ވެއެވެ.

ނިމިދިޔަ ސަރުކާރުގައި ހެދި ބަދަލުދިނުމުގެ ނުވަ އެއްބަސްވުމެއް ބާތިލުކުރަން ނިންމިކަން މިދިޔަ ހަފްތާގައި އެޓާނީ ޖެނެރަލްގެ އޮފީހުން ވަނީ ހާމަވެސްކޮށްފަ އެވެ.