އެންމެ މައްސަލަ ބޮޑެތި ރަށްރަށުގެ ޖަނަރޭޓަރުތަކުގެ އަޕްގްރޭޑަށް ފެނަކައިން މަހަކު 34 މިލިއަން ރުފިޔާ ހަރަދުކުރަން ޖެހޭ ކަމަށް ފެނަކައިގެ މެނޭޖިން ޑިރެކްޓަރުގެ މަގާމުން މިއަދު އިސްތިއުފާ ދެއްވި މުއާޒް މުހައްމަދު ރަޝީދު ވިދާޅުވެއްޖެ އެވެ.

މުއާޒްގެ އިސްތިއުފާގެ ސިޓީގައި މިއަދު ފާހަގަކުރެއްވި އެންމެ ބޮޑު އެއް މައްސަލައަކީ ފެނަކައިން ހިދުމަތް ދޭ ގިނަ ރަށްރަށުގެ ކަރަންޓާއި ފެނުގެ ހިދުމަތުގެ މެއިންޓެނެންސް ރަނގަޅަށް ބެލެހެއްޓިފައި ނެތުމެވެ.

އިސްތިޢުފާގެ ސިޓީ ޢާއްމު ކުރެއްވުމަށްފަހު ރާއްޖޭގެ މީޑިއާއަކަށް ދެއްވި އިންޓަވިއުއެއްގައި މުއާޒް މިއަދު ވިދާޅުވީ ރާއްޖޭގެ ކިތަންމެ ރަށެއްގައި ދެމުންގެންދާ ކަރަންޓާއި ފެނުގެ ހާލަތު ދަށް ކަމަށާއި ބައެއް ރަށްރަށުގައި ރަނގަޅަށް ފަންކާވެސް ނޭނބުރޭ ކަމަށެވެ.

އެހެންވެ އެތަންތަން އަޕްގްރޭޑް ކުރަން ބޭނުންވީ ނަމަވެސް އެކަމަށް ބޭނުންވާ ކޭބަލްތަކާއި ސްޕެއާތައް ނުހޯދައި އެކަން ހައްލު ނުކުރެވޭނެ ކަމަށް މުއާޒް ވިދާޅުވެފައިވެއެވެ.

"އެކަމަށް ގާތްގަނޑަކަށް މިހާރު އަންދާޒާ ކުރެވިފައި އޮތްގޮތުން އެންމެ މައްސަލަ ބޮޑު ރަށްތައް ހައްލު ކުރާ ކަމަށް ވެއްޖިޔާމުވެސް މަހަކު 34 މިލިއަން ރުފިޔާ ހޭދަކުރަން ޖެހޭ ހަމައެކަނި އަފްގްރޭޑްތަކަށްވެސް. އެ 34 މިލިއަން ރުފިޔާއާ އަދި އަޅުގަނޑުމެން އެބަހުރި ބައެއް ކޮންޓްރެކްޓްތަކަށް ވަދެފަ." މުއާޒް ވިދާޅުވި އެވެ.

އޭގެ ތެރޭގައި އައްޑޫގެ ކަރަންޓުގެ ހާލަތު ރަނގަޅުކުރުމަށް ޗައިނާގެ ކުންފުންްޏަކާއެކު ސޮއިކުރި އެއްބަސްވުން ހިމެނޭ ކަމަށާއި އެ އެއްބަސްވުމުގެ ދަށުން ޕްރޮޖެކްޓްގެ 15 އިންސައްތައަށްވާ ފައިސާގެ ތެރެއިން ހަ މަސް ވަންދެން ކޮންމެ މަހަކު 18 މިލިއަނެއްހާ ރުފިޔާ ދޭން ޖެހޭ ކަމަށް މުއާޒް ވަނީ ވިދާޅުވެފައެވެ.

މުއާޒު މިހެން ވިދާޅުވެފައިވާއިރު ފެނަކައަށް ލިބޭ އާާމްދަނީއަށްވުރެ ހަރަދު ބޮޑުވެ ދެމެހެއްޓެނިވި ގޮޮތަކަށް އޮޕަރޭޝަން ކުރިއަށް ނުގެންދެވޭނެ ހާލަތަކަށް ކުންފުނި ވެއްޓިފައިވާތީ މުއާޒް މިއަދު ވަނީ އެކުންފުނީގެ މެނޭޖިންގ ޑިރެކްޓަރުގެ މަޤާމުން އިސްތިއުފާ ދެއްވާފައެވެ.