ރޭސިން އެސޯސިއޭޝަން އޮފް ދި މޯލްޑިވްސްއިން ކުރިއަށްގެންދާ އެންމެ ބޮޑު އެއް ރޭސިން އިވެންޓު ކަމަށްވާ، ރާސް ޗެމްޕިއަންޝިޕް ކުރިއަށް ގެންދަން ހައްލެއް ލިބޭތޯ ބަލަމުންދާކަމަށް ސްޕޯޓްސް މިނިސްޓްރީން ބުނެފިއެވެ.

ހުޅުމާލެ ދެވަނަ ފިޔަަވައްސަށް އަރަން، ވެމްކޯ ކައިރީގާ އޮންނަ ބްރިޖާ ގުޅިފައިވާ މަގުގައި އެ މުބާރާތް ފަށަން މިއަދު ތާވަލުކޮށްފައި އޮތް ނަމަވެސް ހުއްދަ ނުހޯދައި އޮތް ކަމަށް ބުނެ ފުލުހުން އެ އިވެންޓް ބާއްވަން ހުއްދައެއް ނުދިނެވެ.

ނަމަވެސް ރޭސިން އެސޯސިއޭޝަނުން ބުނީ އެ އިވެންޓް ފުރަތަމަ ބާއްވަން އުޅުމުން ރައީސް އޮފީހުން އެކަމާމެދު އިއުތިރާޒެއް ނެތްކަމުގެ ލިޔުމެއް ހުށަހެޅުމަށް އެދުނު ކަމަށެވެ.

އެހެންވެ ފަހުން ހޯމް މިނިސްޓަރު އަލީ އިހުސާނާއި، ޓްރާންސްޕޯޓު މިނިސްޓަރު މުޙައްމަދު އަމީނާއި، ފުލުހުންގެ ވެރިންނާއި، އެޗްޑީސީގެ ވެރިންނާއެކު ބައްދަލުވުމެއްވެސް ބޭއްވި ކަމަށާއި އެ ބައްދަލުވުމުގައި އަނގަބަހުން އެކަމަށް އެޮތީ ހުއްދަދީފައި ކަމަށް ރޭސިން އެސޯސިއޭޝަނުން ބުނެއެވެ.

އެ މައްސަލައާ ގުޅިގެން ރޭސިން އެސޯސިއޭޝަނުން ކަންބޮޑުވުން ފާޅުކުރުމުން ދަނިކޮށް ސްޕޯޓްސް މިނިސްޓްރީން މިއަދު ހަވީރު އެކްސްގައި ބުނީ އެ އިވެންޓް ނުބޭއްވި މަޑު ޖައްސާލަން ޖެހުނުކަން، އެ މިނިސްޓްރީގެ ސަމާލުކަމަށް އައިސްފައިވާ ކަމަށެވެ.

"[މިނިސްޓްރީގެ] ސަމާލުކަމަށް އައި ހިސާބުން ފެށިގެން، މި ވުޒާރާއިން އަންނަނީ ކަމާ ގުޅުންހުރި މިނިސްޓްރީތަކާއި އިދާރާތަކާ، ވާހަކަދައްކައި އެކަމަށް ހައްލެއް ހޯދުމުގެ މަސައްކަތް ކުރަމުން." މިނިސްޓްރީން އެކްސްގައި ބުނެފައި ވެއެވެ.

ރޭސިން މުބާރާތް ބާއްވަން ރަސްމީކޮށް ހުއްދަ އަދި ދީފައިނުވާ އިރު މިދިޔަ އޮގަސްޓު މަހު ރޭސިން ކާރަކުން ޖެހި ޒުވާނަކު ނިޔާވި މައްސަލަ އޮތީ ހޫނުވެފަ އެވެ. އެ މައްސަލައާ ގުޅިގެން ރޭސިންއާއި ޑްރިފްޓިންގެ ހުއްދަތައް ބާތިލުކުރަން ރައީސް މުއިއްޒު އޮތީ އަންގަވައިފަ އެވެ.