ފެނަކައިން މިދިޔަ އަހަރު 21 ރަށެއްގައި މުޅިން އަލަށް ފެނުގެ ޚިދުމަތް އަދި 4 ރަށެއްގައި ނަރުދަމާގެ ޚިދުމަތް ފަށާފައިވާކަމަށް އެކުންފުނިން ހާމަކޮށްފިއެވެ.

ފެނަކައިން ބުނީ މާލީ ގޮންޖެހުންތަކާއެކުވެސް ރައްޔިތުންނަށް އަސާސީ ޚިދުމަތްތައް ފޯރުކޮށްދިނުމަކީ ލަސްކަމެއް ނުވަތަ ހުސްކަމެއް ގެނެވޭނެ ޚިދުމަތްތަކެއް ނޫން ކަމަށެވެ.

އެހެންކަމުން އަލަށް ޚިދުމަތް ދޭންފެށި 21 ރަށާއެކު މިހާރު އެކުންފުނިން ޚިދުމަތް ދެމުން އަންނަ ރަށްރަށުގެ އަދަދު ވަނީ 128 އަށް އަރާފައި ކަމަށް ފެނަކައިން ހާމަކޮށްފައިވެއެވެ.

ފެނަކައިން އަތޮޅުތެރޭގެ 107 ރަށެއްގައި ފެނާއި ނަރުދަމާގެ ހިދުމަތް ދެމުންދާއިރު 92 ރަށެއްގައި ނަރުދަމާގެ ހިދުމަތް ދަނީ ދެމުންނެވެ. އަދި މިދިޔަ އަހަރު 5 ރަށެއްގައި ދުވާލަކު 564 ޓަނުގެ ފެން އުފެއްދުމުގެ ޤާބިލްކަން އިތުރުކުރެވިފައި ވާކަމަށް ފެނަކައިން ވަނީ ބުނެފައެވެ.

ދިވެހިރާއްޖޭގެ ބޮޑެތި އާބާދީ ތަކާއި ކުދި އާބާދީތައް ތަފާތުކުރުމެއް ނެތި މުޅި ދިވެހިރާއްޖެއަށް ފެނާއި ނަރުދަމާގެ ޚިދުމަތްދިނުމުގެ މަޝްރޫއުތަކަކީ ނިމިދިޔަ އެމްޑީޕީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުން ފަށައިގެން ކުރިޔަށް ގެންދިޔަ މަޝްރޫޢުތަކެކެވެ. މިސަރުކާރު ވެރިކަމަށް އައިސް ނިމުނު މިފަދަ ގިނަ މަޝްރޫޢުތަކަކީ އޭރު ފަށައިގެން ކުރިޔަށް ގެންގޮސްފައިވާ މަޝްރޫޢުތަކެކެވެ.

ފެނަކައިން ބަލަހައްޓަމުންގެންދާ 31،092 އަށްވުރެ ގިނަ ފެނުގެ ކަނެކްޝަން އެބަހުރި ކަމަށާއި މީރުފެން އުފައްދާ ނިޒާމުތަކުން ދުވާލަކު 10،661 ޓަނުގެ ފެން އުފެއްދުމުގެ ޤާބިލުކަން އެ ކަނެކްޝަންތަކުގައި ހުރި ކަމަށް ފެނަކައިން ބުނެފައިވެއެވެ.

އޭގެއިތުރުން ފެނަކައިން ބުނީ ބިލުނުކޮށް ހިދުމަތް ދެމުންދިޔަ 22 ރަށެއްގައި މިދިޔަ އަހަރުގެ ސެޕްޓެމްބަރު މަހުގެ ތެރޭގައި މުޅިން އަލަށް ބިލް ކުރަން ފަށާފައިވާ ކަމަށެވެ.