ދިވެހިރާއްޖެއާއި އަވައްޓެރި އިންޑިއާއާ ދެމެދު ދިފާއީ ގުޅުން ވަރުގަދަ ކުރުމާ ގުޅޭގޮތުން މަޝްވަރާތައް ކޮށްފިއެވެ.

ދިފާއީ ވުޒާރާއިން ހާމަކުރި ގޮތުގައި މި މަޝްވަރާކޮށްފައިވަނީ ރާއްޖޭގެ ދިފާއީ ވަޒީރު، ޣައްސާން މައުމޫން އިންޑިއާއަށް ކުރައްވަމުން ގެންދަވާ ރަސްމީ ދަތުރުގެ ތެރެއިން އެގައުމުގެ ދިފާއީ ވަަޒީރު، ޝްރީ ރަޖްނަތު ސިންގ އާއެކު ބޭއްވި ބައްދަލުވުމުގެ ތެރެއިންނެވެ.

މި ބައްދަލުވުމުގައި ރާއްޖޭގެ އަސްކަރިއްޔާގެ އިސް އޮފިސަރުންނާއި ޑިފެންސް މިނިސްޓްރީގެ އިސްވެރިން ބައިވެރިވެވަޑައިގެންނެވިއެވެ. މި މަޝްވަރާތަކުގައި ދެގައުމުގެ ދެމެދުގައި ދިފާއީ ގޮތުން އޮންނަ ގުޅުން އިތުރަށް ބަދަހިކުރުމަށް ކުރެވިދާނެ ކަންކަަމަށް ޚާއްސަކޮށް ވަނީ އަލިއަޅުވާފައެވެ.

މި ދަތުރުފުޅަކީ ޑިފެންސް މިނިސްޓަރުކަމާ ހަވާލުވެވަޑައިގެން ފަހުން ޣައްސާން އިންޑިއާއަށް ކުރައްވާ ފުރަތަމަ ރަސްމީ ދަތުރުފުޅުކަން ފާހަގަ ކުރެވެއެވެ. ޣައްސާންގެ ކުރިން ރާއްޖޭގެ ޚާރިޖީ ވަޒީރު، ޑރ އަބްދުﷲ ޚަލީލްވެސް ވަނީ އިންޑިއާއަށް ރަސްމީ ދަތުރުފުޅެއް ކުރައްވާފައެވެ.

މި ސަރުކާރުން ރާއްޖޭގެ ވެރިކަމާއި ހަވާލުވެވަޑައިގެންނެންވުމާއި ގުޅިގެން ރާއްޖެ އާއި އިންޑިއާގެ ގުޅުން ވަރަށް ބޮޑަށް ހީނަރުވެގެން ދިޔައެވެ. ނަމަވެސް ރައީސް ޑރ. މުހައްމަދު މުއިއްޒު އިންޑިޔާއަށް ކުރެއްވި ދަތުރުފުޅާއިއެކު ދެގައުމުގެ ގުޅުން މިހާރު ވަނީ ވަރަށް ބޮޑަށް ބަދަހިވެފައެވެ.