ރާއްޖޭގެ އޭވިއޭޝަން ނުވަތަ ވައިގެ ދަތުރުފަތުރުގެ ދާއިރާގެ ތެރޭގައި ދިމާވާ ހާދިސާތައް ބަލަން ހާއްސަ އިދާރާއެއް އުފައްދަން ސަރުކާރުން ވިސްނުން ހުރިކަން ޓްރާންސްޕޯޓް މިނިސްޓަރު މުހައްމަދު އަމީން ހާމަކުރައްވައިފިއެވެ.

ދައުލަތުގެ މީޑިޔާއަށް ދެއްވި އިންޓަވިއުއެއްގައި އަމީން ވިދާޅުވީ އެ އިދާރާ އުފެއްދުމާ ގުޅޭ ހުށަހެޅުން މި މަހުގެ ފަހުކޮޅު ކެބިނަޓަށް ވެސް ހުށަހަޅުއްވާނެ ކަމަށެވެ.

މިނިސްޓަރު އަމީން ވިދާޅުވީ މި އަހަރު ޖޫންގައި އިންޓަނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) އިން ރާއްޖޭގެ ސޭފްޓީ އޮޑިޓެއް ކުރަން ވެސް ނިންމާފައިވާކަމަށެވެ.

އައިކާއޯގެ މިންގަނޑަށް ސިވިލް އޭވިއޭޝަން އޮތޯރިޓީގެ އޮނިގަނޑު ބަދަލުކޮށްފައިވާކަން ހާމަކުރައްވަމުން އަމީން ވިދާޅުވީ އައިކާއޯގެ މިންގަނޑަށް، ވައިގެ ހާދިސާތައް ތަހުޤީޤުކުރާ އިދާރާއެއް އުފެއްދުން ވަރަށް މުހިއްމު ކަމަށެވެ.

އަމީން ވިދާޅުވީ ރާއްޖޭގެ ވައިގެ ދަތުރުފަތުރުގެ ދާއިރާ ހަރުދަނާކުރަން ޤާނޫނަށް ގެންނަން ޖެހޭ ބަދަލުތައް ގެނައުމަށް، އެޓާނީ ޖެނެރަލްގެ އޮފީހަށް ވެސް ފޮނުވާފައިވާ ކަމަށެވެ.