މިމަހުގެ 12 ވަނަ ދުވަހުގެ ނިޔަލަށް މަސްވެރިންނަށް ދޭންޖެހޭ ހުރިހާ ފައިސާއެއްދީ ޚަލާސްކޮށްފައިވާ ކަމަށް ސަރުކާރުގެ މަސް ކުންފުނި މިފްކޯ އިން ހާމަކޮށްފިއެވެ.

މިފްކޯއިން މިއަދު ބުނީ މިމަހުގެ 12 ވަނަ ދުވަހު 76 ދޯނިން ޖުމްލަ 307 މެޓްރިކްޓަނުގެ މަސް މިފްކޯއަށް ކިރުވާފައިވާ ކަމަށެވެ. އަދި އެ އުޅަނދުތަކަށް ޖުމްލަ 3.9 މިލިއަން ރުފިޔާ ޖަމާކޮށްފައިވާ ކަމަށް މިފްކޯއިން މަޢުލޫމާތު ދީފައިވެއެވެ.

މިފްކޯއިން ބުނީ މިވަގުތު ޕެންޑިންގައި އޮތީ މިމަހުގެ 13 ވަނަ ދުވަހު މަސްކިރުވި ދޯނިތަކަށް ދޭންޖެހޭ 6 މިލިއަން ރުފިޔާ އެކަނި ކަމަށެވެ.

2023 ވަނަ އަހަރުގެ ނޮވެމްބަރު މަހުގެ 20 ވަނަ ދުވަހުން ފެށިގެން މިއަދުގެ ނިޔަލަށް މިފްކޯއިން ވަނީ މަސްވެރިންނަށް އެއް ބިލިއަނަށް ވުރެ ގިނަ ރުފިޔާ ޖަމާކޮށްފައެވެ. އެއީ 60125 މެޓްރިކްޓަނުގެ މަހަށްވާ ފައިސާއެވެ.

💸 Payments on the way! 🚢 We've shared fishing vessel payments for 76 vessels, totaling MVR 3,955,546. BML transfers between 10:30AM - 12:30PM. Other bank transfers by 4:30PM today! 🐟💳 #48Hours #PaymentsOnTrack #MaldivesFishing pic.twitter.com/S0NChHiHY5

— MIFCO (@mifcomv) January 14, 2025

މަސްވެރިންނަށް ދޭންޖެހޭ ފައިސާގެ ބެކްލޮގް މިހާރު ސާފުކުރެވިފައި ވާތީ، ބީއެމްއެލްގައި އެކައުންޓެއް އޮތް ކޮންމެ މަސްއޮޑިއަކަށް 48 ގަޑިއިރު ތެރޭގައި ފައިސާ ދޫކުރަން ސަރުކާރުން މިހާރުވަނީ ފަށާފައެވެ. އަދި އެމްއައިބީގައި އެކައުންޓު ހުރި މަސްވެރިންނަށް 48 ގަޑިއިރު ތެރޭގައި ފައިސާ ހަމަޖެއްސުމުގެ މަސައްކަތް ކުރަމުން އަންނަ ކަމަށް ވެސް ސަރުކާރުން ހާމަކޮށްފައިވެއެވެ.

ރިޔާސީ އިންތިޚާބުގެ ތެރޭގައި ރައީސް މުޢިއްޒު ވަނީ މަސްވެރިން މިފްކޯއަށް ކިރާ މަހަށް އެންމެ ދަށްވެގެން ކިލޯއަކަށް 20 ރުފިޔާ ދެއްވާނެ ކަމަށް ވިދާޅުވެފައެވެ. ނަމަވެސް ސަރުކާރުން ވަނީ މަހުގެ އަގު 16 ރުފިޔާއަށް ތިރިކޮށްފައެވެ.