އިއާދަކުރަނިވި ހަކަތައަށް ހާއްސަ މީހުން ތަމްރީނުކުރަން ނިންމާފައިވާ ކަމަށް އެންވަޔަރަމަންޓް މިނިސްޓަރު ތޯރިގު އިބްރާހިމް ވިދާޅުވެއްޖެއެވެ.

ޕީއެސްއެމްއިން ރޭ ގެނެސްދިން "ރާއްޖެ" މިއަދު ޕްރޮގްރާމްގައި މިނިސްޓަރު ތޯރިގު ވިދާޅުވީ ރާއްޖެއިން އިއާދަކުރަނިވި ހަކަތައާ ދިމާލަށް މިސްރާބު ޖަހާފައިވާ އިރު އިއާދަކުރަނިވި ހަކަތައިގެ ދާއިރާއިން ތަމްރީނުވެފައި ތިބި މީހުން މުހިންމު ކަމަށެވެ.

އެގޮތުން އިއާދަކުރަނިވި ހަކަތައިގެ އެކި ކަންކަމަށް ބޭނުންވާ ތަކެތި އިންސްޓޯލް ކުރުމާއި އެކި މައްސަލަަތައް ހައްލުކުރަން ވެސް އެކަމުގައި ތަމްރީނުވެފައި ތިބޭ މީހުން ބޭނުންވާ ކަމަށް ވެސް މިނިސްޓަރު ވިދާޅުވިއެވެ.

"އެހެންވީމާ އެކަންތައްތަތަކަށް މީހުން ބޭނުންވާތީ ޓްރެއިންކުރުމުގެ ކަންތައްތައް ކުރިއަށް ގެންދަން އަޅުގަނޑުމެން ބޭނުންވާ ވާހަކަ އޮންނާނީ ލިޔެފައި"މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ މިހާރުވެސް ރާއްޖޭގެ އެކި ކަންކޮޅުތަކުގައި އެކި މިންވަރުގައި އިއާދަކުރަނިވި ހަކަތަ ބޭނުން ކުރަމުންދާ ކަމަށެވެ.

އޭގެ ތެރެއިން ވ. ރަކީދޫ ފަދަ މަދު މީސްކޮޅެއް ދިރިއުޅޭ ކުދި ބައެއް ރަށްރަށުގައި މިހާާރު ކަރަންޓް ދެމުންދަނީ ސޯލާ ޕެނަލް ޖަހައިގެންނެވެ.