ހޯމްލޭންޑް ސެކިއުރިޓީ މިނިސްޓަރު ޢަލީ އިޙްސާންގެ އިތުބާރު ނެތްކަމުގެ މައްސަލައެއް އެމްޑީޕީން ރައްޔިތުންގެ މަޖިލީހަށް ވައްދައިފިއެވެ.

އެ ޕާޓީގެ 12 މެންބަރުން ސޮއިކޮށް މިއަދު ރައްޔިތުންގެ މަޖިލީހަށް ފޮނުވާފައިވާ މައްސަލާގައި ވަނީ އިޙްސާނާއި ގުޅޭ ގިނަ މައްސަލަތަކެއް ފާހަގަކޮށްފައެވެ.

މައިގަނޑު 3 ދާއިރާއަކުން މައްސަލަތައް ފާހަގަކޮށްފައިވާއިރު އޭގެތެރެއިން އެއްކަމެއްގެ ގޮތުގައި ބުނެފައިވަނީ، ރާއްޖޭގެ ކުންފުންޏަކުން ތައްޔާރުކޮށްފައިވާ އޮންލައިން އެކްސްޕެޓް ސިސްޓަމެއް އޮއްވައި، އެ ސިސްޓަމް ބޭނުން ނުކޮށް، ބިދޭސީންގެ ހުރިހާ ކަމެއް ބެލެހެއްޓުމުގެ މަސައްކަތް މެލޭޝިއާގެ ބެސްޓިނެޓް ކުންފުންޏާ ހަވާލުކުރި މައްސަލައެވެ. އޭގައި ބުނެފައިވަނީ ބެސްޓިނެޓަކީ ބްލެކް ލިސްޓް ކުރެވިފައިވާ ކުންފުންޏެއް ކަމަށެވެ.

އެމްޑީޕީން އިތުރަށް ބުނެފައިވަނީ، ރާއްޖޭގެ ކުންފުނިން ތައްޔާރުކޮށްފައިވާ ސިސްޓަމް މެދުވެރިކޮށް ހަރަދު ކުޑަކޮށް އެ މަސައްކަތް ކުރެވެން އޮއްވައި، ބެސްޓިނެޓާ ހަވާލުކުރުމަކީ ދައުލަތަށް ލިބެންވާ ފައިދާއަށް އުނިކަން ލިބޭނެ ކަމެއް ކަމަށާއި އަދި އެއީ ގާނޫނުލް އުގޫބާތުގެ 517 ވަނަ މާއްދާގައި ބަޔާންކޮށްފައިވާ ޖިނާއީ ކުށުގެ އަމަލެއް ކަމަށެވެ.

އޭގެ އިތުރުން ދެން ފާހަގަކޮށްފައިވާ އަނެއްކަމަކީ، ފުލުހުންގެ އިދާރާ ނުފޫޒުން އެއްކިބާވެ މަސައްކަތްތައް ކުރުމަށް މިނިސްޓަރު އިޙްސާން ހުރަސް އަޅުއްވާކަމަށް ބުނެފައިވާ މައްސަލައެވެ. އެމްޑީޕީން ބުނެފައިވަނީ މިނިސްޓަރު އިޙްސާން ގެންދަވަނީ ފުލުހުންގެ އިދާރާއަށް ސިޔާސީ ނުފޫޒު ފޯރުވައި، ފުލުހުންގެ ތަހުގީގުތަކަށް ވެސް ނުފޫޒު ފޯރުވަމުން ކަމަށެވެ.

ދެން ފާހަގަކޮށްފައިވާ އަނެއް މައްސަލައަކީ، ޕީއެންސީއަށް މެންބަރުން އިތުރުކުރުމަށް އިލެކްޝަންސް ކޮމިޝަނަށް ވަގު ފޯމު ހުށަހެޅުމުގައި ޑީއެންއާރުގެ ޑާޓާބޭސް ބޭނުންކޮށްގެން މިނިސްޓްރީތެރޭ ފޯމް ފުރުމުގެ މަސައްކަތް ކުރިކަމަށްބުނާ މައްސަލަގައި ސީދާ މިނިސްޓަރު އިޙްސާން ޝާމިލުވާކަމަށް ބުނެ ފާހަގަކޮށްފައިވާ މައްސަލައެކެވެ.

އެމްޑީޕީން މި މައްސަލަ މަޖިލީހަށް ވެއްދިނަމަވެސް، މި މައްސަލަ އެޖެންޑާކުރާނެ ދުވަހެއް އަދި މަޖިލީހުން ހާމަކޮށްފައެއް ނުވެއެވެ.