ޝަންގްރިއްލާ މައްސަލައަށް މިއަހަރު ތެރޭ ހައްލެއް ހޯދޭނެ ކަމަށް ރާއްޖޭގެ ފަތުރުވެރިކަމާ ބެހޭ ވަޒީރު އިބްރާހިމް ފައިސަލް ވިދާޅުވެއްޖެއެވެ.

ޕީއެސްއެމް ނިއުސް އަށް ދެއްވި އިންޓަވިއުއެއްގައި ފައިސަލް މިހެން ވިދާޅުވީ ޝަންގްރިއްލާ ރިސޯޓު އަލުން ހުޅުވުމަށް ކުރަމުންދާ މަސައްކަތްތައް ހިއްސާ ކުރައްވަމުންނެވެ. އެގޮތުން ފައިސަލް ވިދާޅުވީ އެޓާނީ ޖެނެރަލް އޮފީހުން މިހާރު ޝަންގްރިއްލާއަށް ނޯޓިސް ދީފައިވާ ކަމަށެވެ. އަދި މިއަހަރުގެ ތެރޭގައި މި މައްސަލައަށް ހައްލެއް ހޯދޭނެ ކަމަށްވެސް ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ އައްޑޫ ސިޓީގައި ފަތުރުވެރިކަން ފުޅާ ކުރުމަށްޓަކައި އެ ސިޓީއަށް ބައިނަލްއަގްވާމީ ވައިގެ ދަތުރުތައް މުހިންމު ކަމަށެވެ. އަދި މިހާރު އެކަމާ ގުޅޭ މަސައްކަތްތައްވެސް ކުރަމުންދާ ކަމަށް ވަޒީރު ވިދާޅުވިއެވެ.

"ހާއްސަ އިސްކަމެއް ދީގެން ޝަންގްރިއްލާ ހުޅުވުމާ، އައްޑޫ ސިޓީއަށް ކޮންމެ މަހަކުވެސް ރެގިއުލާކޮށް ބައިނަލްއަގްވާމީ ފްލައިޓުތައް ގެނެވޭ ގޮތަށް ހެދުމުގެ މަޝްވަރާތައް ކުރަމުން މިދަނީ." ފައިސަލް ވިދާޅުވިއެވެ.

އަދި މިކަމަކީ އައްޑޫ ރައްޔިތުންނަށްޓަކާ ސަރުކާރަކުން ކުރެވޭނެ އެންމެ މުހިންމު މަސައްކަތް ކަންވެސް ވަޒީރު ފާހަކުރެއްވިއެވެ.

ޝަންގްރިއްލާ ރިސޯޓަކީ އައްޑޫގެ އެންމެ ބޮޑު ރިސޯޓެވެ. ކޯވިޑިގެ ބަލިމަޑުކަމާ ގުޅިގެން ޝަންގްރިއްލާ ރިސޯޓު ބަންދު ކުރުމަށްފަހު އަލުން ނުހުޅުވާ ގިނަ އަހަރުތަކެއް ވުމުގެ ސަބަބުން އައްޑޫގެ ރައްޔިތުން ދަނީ ކަންބޮޑުވުން ފާޅު ކުރަމުންނެވެ.

މި ރިސޯޓަކީ އައްޑޫގެ ގިނަ ބަޔަކު ވަޒީފާ އަދާކުރަމުންދިޔަ ރިސޯޓެއް ކަމަށްވީއިރު، މި ރިސޯޓު ބަންދު ކުރުމާ ގުޅިގެން އެތައް ބައެއްގެ ވަޒީފާ ވަނީ ގެއްލިފައެވެ. މި ރިސޯޓު އަލުން ހުޅުވުމަކީ ރައީސް ޑރ. މުހައްމަދު މުއިއްޒުގެ ވައުދުފުޅެކެވެ.