މަގުމަތިން ވެރިކަން ވައްޓާލުމާގުޅޭ ވާހަކަތަކެއް އުމަރު ނަސީރު ދެއްކެވުމުން އެކަމަށް ނާއިބު ރައިސް ޙުސައިން މުޙައްމަދު ލަތީފު ފާޑުވިދާޅުވެއްޖެއެވެ.

ޓީވީ ޕްރޮގްރާމެއްގައި ކުރީގެ ހޯމް މިނިސްޓަރ އުމަރު އިއްޔެރޭވަނީ، ދިވެހީންނަކީ ހުކުރުން ފައިބައިގެން ގުޅަކުޅޭ ފަސްގަނޑަށްގޮސް ރަސްގެފާނު ބަދަލުކުރާ ބައެއް ކަމަށް ވިދާޅުވެ، އެގޮތަށް ރައީސް ޑރ މުއިއްޒު ގެ ވެރިކަން ވެސް މަގުމަތިން ވައްޓާލާން ޖެހިއްޖެނަމަ އެކަން އެގޮތަށް ކުރާނެ ކަމުގެ އިންޒާރު ދެއްވާފަ އެެވެ. ދިވެހީން އެކަން ނުކުރާނެކަމަށް ރައީސް ޑރ. މުޙައްމަދު މުޢިއްޒު ދެކިވަޑައިގަންނަވައިގެން ނުވާނެކަމަށް ވެސް އުމަރު ވިދާޅުވެފައިވެއެވެ.

އެއާއި ގުޅިގެން ނާއިބު ރައީސް ޙުސައިން މުޙައްމަދު ލަތީފު މިއަދު ފޭސްބުކްގައި ވިދާޅުވީ، ރައީސް ޑރ. މުޙައްމަދު މުޢިއްޒަކީ އަބަދުވެސް ބިނާކުރަނިވި ފާޑުކިޔުމަށް ޖާގަދެއްވާ ބޭފުޅެއް ކަމަށާއި އެއީ ގައުމަށް އަދި ރައްޔިތުންނަށް ހިދުމަތެއް ކޮށްދެއްވަން ނުކުމެވަޑައިގަންނަވާ ކޮންމެ ވެރިއެއް ނުވަތަ ސިޔާސީ ބޭފުޅެއްގެ ކިބައިގައި ހުންނަން ވާނެ ސިފައެއް ކަމަށެވެ.

އަދި ފާޑުކިޔުމުގެ ނަމުގައި ދިވެހި ރައްޔިތުންނަކީ ނާތަހުޒީބު، ޑިމޮކްރެސީ އާއި ދުރުބައެއް ކަމަށްބުނެ، ރައްޔިތުންނަށް ހަޖޫޖެހުމަކީ ދަށުދަރަޖައިގެ އަމަލެއްކަމަށް ނައިބު ރައީސް ވަނީ ވިދާޅުވެފައެވެ.

އުމަރު އެ ޕްރޮގްރާމްގައި ވަނީ ދިވެހިން މުޒާހަރާ ކޮށްގެން ރައީސް ނަޝީދުގެ ވެރިކަން މަގުމަތިން ވައްޓާލިކަމަށް ވިދާޅުވެ އެކަމުގެ ހަދާން އާކޮށްދެއްވާފައެވެ.