އިތުރު ފުރިހަމަކަމެއް ގެނެސް ޗާޕުކުރެވުނު 100 ރުފިޔާގެ ނޫޓު މިހާރުން ފެށިގެން ބޭނުން ކުރަމުންދާނެ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ބުނެފިއެވެ.

ދިވެހި ރުފިޔާގެ ނިޝާނާއެކު ޗާޕުކުރެވުނު 100 ރުފިޔާގެ އާ ނޫޓުގެ ދެ ފަރާތުގައިވެސް އައު ދިވެހި ރުފިޔާގެ ނިޝާން ހިމަނާފައި ވާނެ ކަމަށް އެމްއެމްއޭ އިން ވަނީ ބުނެފައެވެ. އެގޮތުން ދިވެހި ރުފިޔާގެ ނިޝާން ހިމަނާފައިވާނީ ނޫޓުގެ މޫނުމަތީގެ ވައަތްފަރާތުން މަތީގައިވާ، މޫނުމަތީ އަގާއެކު އަދި ނޫޓުގެ ފަހަތުގެ ކަނާއަތް ފަރާތުން މަތީގައިވާ، މޫނުމަތީ އަގާއެކުގައި ކަމަށް އެމްއެމްއޭ އިން ބުނެއެވެ.

މިހާރު ބޭނުންކުރަން ފެށި އާ ނޫޓުތަކުގައި އެކުލެވޭ ބައެއް ސެކިއުރިޓީ ފީޗާސްތަކަށް ބަލާއިރު މި ނޫޓުތަކަށް އަލްޓްރާ ވައިލެޓް އަލި އެޅުވުމުން ނޫޓުގެ ސީރިއަލް ނަމްބަރާއި މޫނުމަތީ އަގު ގޮޅިއެއްގައި ދިއްލިފައި ހުންނާނެއެވެ. މިއީ އާދައިގެ އަލީގައި ފެންނާން ހުންނާނެ އެއްޗެއްނޫނެވެ.

އެމްއެމްއޭ އިން ބުނީ އައު ޗާޕުގައި ބަދަލު އައިސްފައިވާ އިތުރު ކަންކަމުގެ ތެރޭގައި ކުރީގެ ގަވަރުނަރު އަލީ ހާޝިމްގެ ސޮއި ހިމެނިފައިވުން ހިމެނޭ ކަމަށެވެ. އަދި އެ ނޫޓުގައި ޗާޕުކުރި ތާރީހަކަށް ޖަހާފައި ވާނީ ހަތެއް ޖުލައި 2024 ކަމަށްވެސް އެ އޮތޯރިޓީން ވަނީ ބުނެފައެވެ.

އެމްއެމްއޭ އިން ތައާރަފުކޮށްފައިވާ 100 ރުފިޔާގެ ނޫޓު 19 ޖެނުއަރީން ފެށިގެން ދައުރުކުރަން ފަށާފައިވާ ކަމަށް އެ އޮތޯރިޓީން ބުނެއެވެ.