ސިޔާސީ ޕާޓީތަކުގެ ދަފްތަރަށް ޝަކުވާ ހުށައެޅުމަށް ހުޅުވާލި ފުރުސަތުގައި މިހާތަނަށް 416 ހުށައަޅާފައިވާ ކަމަށް އިލެކްޝަންސް ކޮމިޝަނުން ހާމަކޮށްފިއެވެ.

އީސީން މިއަދު ބުނީ ޕާޓީތަކުގެ ދަފްތަރަށް ޝަކުވާ ހުށައެޅުމަށް މިމަހުގެ 23 ވަނަ ދުވަހު ހުޅުވާލި ފުރުސަތުގައި ޕާޓީތަކުގެ ދަފްތަރަށް ހުށައަޅާފައިވާ ޝަކުވާގެ 60 އިންސައްތަ އަކީ ޕީއެންސީގެ ފޯމްތަކަށް ހުށައަޅާފައިވާ ޝަކުވާ ކަމަށެވެ. އެގޮތުން އެޕާޓީގެ ފޯމްތަކަށް 252 ޝަކުވާ ހުށައަޅާފައިވެއެވެ.

އޭގެއިތުރުން ޖުމްހޫރީ ޕާޓީއާ ގުޅޭ 54 ޝަކުވާ އާއި ޢަދާލަތު ޕާޓީގެ 27 ޝަކުވާ އާއި އެމްޑީއޭގެ 26 ޝަކުވާ ވަނީ ހުށައަޅާފައެވެ. އީސީން ބުނީ އެމްޑީޕީގެ ފޯމުތަކާ ގުޅޭގޮތުން ހުށައަޅާފައިވަނީ 13 ޝަކުވާ ކަމަށެވެ.

އީސީގެ ދަފްތަރު ދައްކާގޮތުން ވެރިކަންކުރާ ޕީއެންސީގައި މިވަގުތު ތިބީ 68968 މެންބަރުންނެވެ. އަދި އިދިކޮޅު އެމްޑީޕީގައި ތިބީ 43755 މެންބަރުންނެވެ.

ސިޔާސީ ޕާޓީގެ ދަފްތަރުގައި ހިމެނޭ މެމްބަރުންގެ ލިސްޓަށް ޝަކުވާ ހުށަހަޅަންޖެހެނީ ޝަކުވާ ޕޯޓަލް މެދުވެރިކޮށެވެ. އީސީން ބުނީ، ޝަކުވާ ޕޯޓަލް މެދުވެރިކޮށް އޮންލައިންކޮށް ޝަކުވާ ހުށަހަޅާއިރު، ޝަކުވާ ހުށަހަޅަން އެދޭ މީހާގެ ދިވެހި ރައްޔިތެއްކަން އަންގައިދޭ، މުއްދަތު ހަމަނުވާ ރަސްމީ ލިޔުމެއްގެ ކޮޕީއެއް ހުށަހަޅަންޖެހޭނޭ ކަމަށެވެ. އަދި މީގެއިތުރުން އިލެކްޝަންސް ކޮމިޝަނުގެ ޝަކުވާ ޕޯޓަލްގައިވާ ހުރިހާ މައުލޫމާތެއް ފުރިހަމަކޮށް ސާފު ފޮޓޯއެއް ހުށަހަޅަން ޖެހޭނެއެވެ.

މިފަހުން ސައްހަ ނޫން ފޯމުތަކެއް ފުރައިގެން ސިޔާސީ ޕާޓީތަކަށް މީހުން ވައްދާ މައްސަލައިގެ އަޑު ގަދަވެފައިވަނީ ވެރިކަންކުރާ ޕީއެންސީއަށް މެންބަރުން އިތުރު ކުރުމުގައި ޖިނާޢީ ކުށްތަކެއް ކޮށްފައިވާ ކަމަށް ތުހުމަތުކޮށް އިދިކޮޅު އެމްޑީޕީން އެ މައްސަލަތައް ފުލުހުންނަށާއި އޭސީސީއަށް ހުށައެޅުމުންނެވެ.

އެހެންނަމަވެސް އެމްޑީޕީގެ ތުހުމަތުތައް ޕީއެންސީން ވަނީ ދޮގުކޮށްފައެވެ.