އެމްޑީޕީން މިރޭ ނުކުމެ ތިބީ ވަރަށް ސީރިއަސްކަމެއްގައި ކަމަށާއި ރައްޔިތުން މަގުމައްޗަށް ނުކުންނާނީ ސީރިއަސްވީމަކަމަށް ރައްޔިތުންގެ މަޖިލީހުގެ ކެންދޫ ދާއިރާގެ އެމްޑީޕީ މެންބަރު މައުރޫފް ވިދާޅުވެއްޖެއެވެ.

"ފުދިއްޖެ ފުނޑިއްޖެ" މި ނަމުގައި އެމްޑީޕީން މިރޭ ކުރިއަށް ގެންދިޔަ އެއްވުމުގައި ވާހަކަ ދައްކަވަމުން މައުރޫފް ވިދާޅުވީ، އަނބިދަރިން ދޫކޮށް މަގުމައްޗަށް ނުކުމެ ރައްޔިތުން ސީރިއަސްކަމާއެކު ސަރުކާރަށް އަޑުއިއްވަން ނުކުމެ ތިބުން އެއީ އާދައިގެ ކަމެއްކަމަށް ނަގައިގެން ނުވާނެކަމަށެވެ.

އަދި ރައްޔިތުން މަގުމައްޗަށް ނުކުމެ ޝުއޫރު ފާޅުކުރީމަ ރައީސް ޑރ. މުޙައްމަދު މުޢިއްޒު އެއަޑު އައްސަވަން ވާނެކަމަށާ ރައްޔިތުން ތިބީ ރުޅިއައިސްފައިކަމަށް ވެސް އޭނާ ވިދާޅުވިއެވެ.

"ހަމަ ސަމާސާއަކަށް ނޫން. މިތިބީ ރުޅިއައިސްފައި. ރުޅިއައީމަ ކިހިނެއް ވާނީ. ނުކުމެ ވެރިކަން ވައްޓާލާނީ" އެއްވުމުގެ ތެރޭގައި މައުރޫފް ވިދާޅުވިއެވެ.

އޭނާ ވިދާޅުވީ ސަރުކާރުން ވަނީ މަސްވެރިންނާއި ރިސޯޓް މުވައްޒަފުންނާއި ޓެކްސީ ޑްރައިވަރުންނާއި ފުލެޓާއި ގޯތީގެ ވެރިން ބިކަކޮށްފައި ކަމަށާއި އެ އެންމެންވެސް ތިބީ ސަރުކާރު ދެކެ ރުޅިއައިސްފައިކަމަށެވެ.

މިރޭގެ އެއްވުމުގައި އެމްޑީޕީގެ ލީޑަރޝިޕްގެ ގިނަ ބަޔަކު ބައިވެރިވެފައިވާއިރު އާންމު މެންބަރުންނާއެކު ގިނަބަޔަކު ވަނީ ސަރުކާރާ ދެކޮޅަށް އަޑު އުފުލާފައެވެ.