ދުނިޔޭގެ އެންމެ އުސް ޕްރީކާސްޓް ސެގްމަންޓް ރާއްޖޭގެ ބުރިޖެއްގައި މިއަދު ބަހައްޓައިފިއެވެ.

މި ޕްރީކާސްޓް ސެގްމަންޓް ބަހައްޓާފައި ވަނީ މާލެ-ވިލިމާލެ ގުޅުވާލާ ތިލަމާލެ ބްރިޖުގައެވެ. އެކްސްގައި ކުރި ޕޯސްޓެއްގައި އިންޑިއާ ހައިކޮމިޝަނުން ބުނީ މިއީ އިންޖިނިއަރިންގެ ދާއިރާ އިން ހޯދުނު ބޮޑު ކާމިޔާބެއް ކަމަށާއި އަދި މިއީ ދުނިޔޭގެ އެންމެ އުސް ޕްރީކާސްޓް ކަމަށެވެ.

އެ ކޮމިޝަނުން ބުނީ އެ ޕްރީކާސްޓުގެ އުސްމިނުގައި 8.2 މީޓަރުގެ، ފުޅާމިނުގައި 25.3 މީޓަރު ހުންނާނެ ކަމަށެވެ.

ތިލަމާލެ ބްރިޖަކީ މި ވަގުތު ރާއްޖޭގައި ކުރިއަށްދާ އެންމެ ބޮޑު މަޝްރޫއެވެ. ކުރީގެ ސަރުކާރުން ފެށި ތިލަމާލެ ބްރިޖަކީ އިންޑިއާގެ އެފްކޮންސް އިންފްރާސްޓްރަކްޗާ އިން ކުރިއަށް ގެންދާ މަޝްރޫއެކެވެ.

ތިމަލާމެ ބްރިޖްގެ މަސައްކަތް ކުރިއަށްދާ ގޮތާ ގުޅޭ ގޮތުން މިނިސްޓްރީން ބުނީ މި މަހުގެ 15 އާ ހަމައަށް އެ ބްރިޖްގެ 52.44 އިންސައްތަ ނިމިފައިވާކަމަށެވެ. އަދި މިހާރު ކުރިއަށް ދަނީ ޕައިލް ކެޕުން އާއި ޕިއާ ކޮލަމްސް އެޅުމުގެ މަސައްކަތާއި ސުޕަ ސްޓްރަކްޗާ ސެގްމެންޓްސް ލޯންޗް ކުރުމުގެ މަސައްކަތް ކަމަށް މިނިސްޓްރީން ބުންޏެވެ.

މި ބްރިޖް ނިންމައި ސަރުކާރާ ހަވާލުކުރުމަށް މިހާރު ނިންމާފައި އޮތީ އަންނަ އަހަރުގެ ސެޕްޓެމްބަރުގެ ނިޔަލަށެވެ. ޖުމްލަ 6.7 ކިލޯމީޓަރުގެ ތިލަމާލެ ބްރިޖަށް މިހާތަނަށް 251.5 މިލިއަން ރުފިޔާ ހޭދަވެފައިވެ އެވެ.