އަންހެނުން ވިޔަފާރީގެ ދާއިރާއަށް ނުކުތުމަށް ހިތްވަރު ދިނުމުގެ ގޮތުން އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން، އެސްޑީއެފްސީން މުޅިން އައު ފައިނޭންސިންގ ސްކީމެއް ތަޢާރަފުކުރުމަށް ނިންމައިފި އެވެ.

އެސްޑީއެފްސީ އިން ބުނީ މި މަޝްރޫޢުގެ މަޤްޞަދަކީ އަންހެނުން ވިޔަފާރީގެ ދާއިރާއަށް ނުކުތުމަށް ހިތްވަރު ދިނުމާއި ވިޔަފާރީގައި ހަރާކާތްތެރިވާ އަންހެން ވިޔަފާރިވެރިންނަށް ފަސޭހަކަމާއެކު މާލީ އެހީތެރިކަން ފޯރުކޮށްދިނުމާއެކު އަންހެނުން ބާރުވެރި ކުރުވައި، އިޤްތިޞާދީ މިނިވަންކަން އިތުރުކޮށް، އަންހެނުން ހިންގާ ވިޔަފާރިތައް ކުރިއެރުވުންކަމަށެވެ. އެގޮތުން މި ސްކީމުގެ ދަށުން ތަފާތު އެކި ދާއިރާތަކުން ވިޔަފާރި ކުރަން ބޭނުންވާ ފަރާތަކުން އެސްޑީއެފްސީއިން ފައިނޭންސިންގ ދިނުމަށް ހަމަޖެހިފައިވެއެވެ.

އަންހެނުން ވިޔަފާރިވެރިންނަށް ހާއްސަ އައު ފައިނޭންސިންގ ސްކީމަށް އެޕްލިކޭޝަން ހުޅުވާލުމަށް ހަމަޖެހިފައިވަނީ މިއަންނަ ނޮވެންބަރު ފުރަތަމަ ހަފްތާ ތެރޭގައެވެ. އެޕްލިކޭޝަން ބަލައިގަންނާނީ އެސްޑީއެފްސީގެ ވެބްސައިޓް ގައިވާ 'އެސްއެމްއީ ޕޯޓަލް' މެދުވެރިކޮށެވެ. އަދި ސްކީމާ ގުޅޭ އިތުރު ތަފްޞީލުތައް ކުރިއަށް އޮތް ދުވަސްތަކުގައި ހިއްސާކުރެވޭނެކަމަށް އެސްޑީއެފްސީން ބުންޏެެވެ.

މި ސްކީމް ތަޢާރަފުކުރުމާ ގުޅޭގޮތުން އެސްޑީއެފްސީގެ މެނޭޖިންގ ޑިރެކްޓަރ ބަދުރުއްދީން ޙަސަން ވިދާޅުވެފައިވާގޮތުން "މިއީ ދިވެހި އަންހެން ވިޔަފާރިވެރިންގެ ހުނަރާއި ޤާބިލުކަން ދައްކުވައިދިނުމަށް ހުޅުވާލެވޭ މަގެއް. މި ސްކީމްގެ ދަށުން، ފަސޭހަ އަދި ލުއި ގޮތްތަކެއްގެ މަތިން ފައިސާ އަނބުރާ ދެއްކޭނެ ގޮތަށް މާލީ އެހީތެރިކަން ފޯރުކޮށްދެވޭ. މީގެ ސަބަބުން އަންހެނުންނަށް ވިޔަފާރީގެ ދާއިރާއަށް ނުކުމެ، އަމިއްލަ މަސައްކަތް ފެށުމަށާއި، ދެމިގެންދާނެ އިގްތިސާދީ ކުރިއެރުމެއް ހޯދުމަށް މަގު ތަނަވަސްވެގެންދާނެ. އެފަރާތްތަކަށް މި ފުރުސަތު ލިބިގެންދިއުމާއިއެކު، ގިނަ ފަރާތްތަކަކަށް އެފަރާތްތަކުގެ ވިޔަފާރީގެ ލަނޑުދަނޑިތައް ހާސިލުކޮށް، ވިޔަފާރީގެ މައިދާނުގައި ފާހަގަކޮށްލެވޭ ކާމިޔާބީތަކެއް ހޯދާނެކަމަށް އުންމީދުކުރެވޭ" ކަމަށެވެ.

މި ސްކީމަކީ އަންހެނުން ވިޔަފާރިއަށް ނުކުތުމަށް ހިތްވަރުދީ އެހީތެރިވުމަށް އެސްޑީއެފްސީން ތަޢާރަފުކޮށްފައިވާ މުހިންމު އިސްނެގުމެކެވެ. މީގެ ސަބަބުން އަންހެނުންނަށް ވިޔަފާރި ފެށުމަށާއި، ކުރިއެރުވުމަށާއި، އަދި ގައުމުގެ އިގްތިސާދީ ތަރައްގީއަށް މުހިންމު ދައުރެއް އަދާކުރާ ބައެއްގެ ގޮތުގައި ވުމަށް ބޭނުންވާ މާލީ ވަސީލަތްތައް ލިބިގެންދާނެއެވެ.

އަލަށް މި އިއުލާނު ކުރެވުނު ސްކީމްގެ އިތުރުން، އެސްޑީއެފްސީ އިން މިހާރު ވެސް އަންނަނީ 2024 ވަނަ އަހަރު މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް އަދި މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓާ ގުޅިގެން ފަށާފައިވާ "ފަށާ މަދަދު ލޯނު" ސްކީމުގެ ދަށުން ފައިނޭންސިންގ ދޫކުރަމުންނެވެ. ޖުމްލަ 100 މިލިއަން ރުފިޔާގެ މި ސްކީމަކީ 5 ފިޔަވައްސަކަށް ބަހާލައިގެން، ކޮންމެ ފިޔަވައްސަކަށް 20 މިލިއަން ރުފިޔާ ކަނޑައަޅައި، އަދި ކޮންމެ ފިޔަވައްސެއްގެ 25 އިންސައްތަ ނުކުޅެދުންތެރިކަން ހުންނަ ފަރާތްތަކަށް ހާއްސަ ކޮށްގެން ހިންގޭ ސްކީމެކެވެ. ފަށާމަދަދުގެ 2 ފިޔަވައްސެއްގެ އެޕްލިކޭޝަންތައް މިހާރުވަނީ ބަލައިގަނެފައެވެ.

އެގޮތުން ފަށާމަދަދު ސްކީމްގެ ފުރަތަމަ ފިޔަވައްސަށް 2024 ވަނަ އަހަރު ހުޅުވާލައި، މި ފިޔަވަހީގެ ދަށުން 63 ފަރާތަކަށް ލޯނު އެޕްރޫވްކޮށް، ލޯނުގެ ފައިސާ ވަނީ ދޫކޮށްފައިއެވެ. މީގެ ތެރޭގައި ނުކުޅެދުންތެރިކަން ހުންނަ 4 ފަރާތް ހިމެނެއެވެ. މި ފިޔަވަހީގެ ދަށުން މާލެ ސަރަހައްދު ހިމެނޭހެން 16 އަތޮޅަކަށް މިލޯނު ދޫކޮށްފައިވަނީ، ތަފާތު 13 ބާވަތުގެ ވިޔަފާރި ހަރަކާތްތަކަށެވެ. މީގެ ތެރޭގައި ހޯލްސޭލް، ރީޓެއިލް، ކާބޯތަކެތި ޓޭކްއަވޭ ޚިދުމަތް، ފުޑް ފެކްޓަރީ، ފެހުން، ސެލޫން، ފޮޓޯގްރަފީ އަދި ވީޑިއޯގްރަފީ، އަތްތެރި މަސައްކަތް، ޖިމް އަދި ފިޓްނަސް ސެންޓަރ، މަސް ޕްރޮސެސް ކުރުން، ތައުލީމް ދިނުން، ކްލިނިކް އަދި ހެލްތު ސާވިސަސް އާއި ބޭކަރީ ވިޔަފާރިތައް ހިމެނެއެވެ.

މި ފިޔަވަހީގައި ދޫކުރި ލޯނުތަކުގެ ތެރެއިން 45 އިންސައްތަ ވިޔަފާރިތައް މިހާރު ހިންގަމުންދާއިރު، އެހެނިހެން މަޝްރޫޢުތައް ފެށުމަށް ކުރެވޭ މަސައްކަތްތައް އެސްޑީއެފްސީން ގާތުން ބަލައި ބޭނުންވާ އެހީތެރިކަން ދަނީ ފޯރުކޮށްދެމުންނެވެ.

މީގެއިތުރުން އެސްޑީއެފްސީން ބުނީ މި އަހަރުގެ ޖޫން 15 އިން އޮގަސްޓް 31 އަށް ހުޅުވާލެވުނު ދެވަނަ ފިޔަވަހީގައި 205 ފަރާތަކުން ހުށަހެޅި އެޕްލިކޭޝަންތަކުގެ ތެރެއިން 47 އެޕްލިކޭޝަން މިހާރުވަނީ ޕްރޮސެސްކުރުމުގެ މަރުހަލާގައިކަމަށެވެ. އަދި މިހާތަނަށް 8 ފަރާތަކަށް ލޯނު އެޕްރޫވްކުރެވި، ފައިސާ ދޫކުރަން ފަށާފައިވާކަމަށެވެ.

މި ފިޔަވަހީގައި ކަނޑައެޅިފައިވާ 20 މިލިއަން ރުފިޔާގެ އަދަދު ހަމަވުމާއެކު، 110 އެޕްލިކޭޝަން ވަނީ ވެއިޓްލިސްޓްގައި ހިމަނާފައިވާކަމަށްވެސް އެސްޑީއެފްސީން ހާމަކޮށްފައިވެއެވެ.