އަންނަ އެޕްރީލް މަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބުގެ ކެމްޕެއިން މެނޭޖަރަކަށް ގަލޮޅު އުތުރު ދާއިރާގެ މަޖިލިސް މެންބަރު މުހައްމަދު އިބްރާހިމް (ކުޑޫ) އައްޔަންކޮށްފިއެވެ.

އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ބުނީ، ކެމްޕެއިން މެނޭޖަރުގެ ނައިބުންގެ ގޮތުގައި ތިން ބޭފުޅަކު ހަމަޖައްސާފައިވާ ކަމައެވެ. އެއީ ގާނޫނީ ވަކީލު އައިކު އަހްމަދު އީސާގެ އިތުރުން، ހުޅުމާލެ ދާއިރާގެ ކުރީގެ މެންބަރު އަލީ ނިޔާޒް އަދި ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ އެވެ.

ކެމްޕެއިންގެ އިދާރީ އޮނިގަނޑު އެކުލަވާލުމުގެ ތެރެއިން، އިންތިޚާބުގެ ތަރުޖަމާނަކަށް އެމްޑީޕީން ހަމަޖެއްސީ ދިއްދޫ ދާއިރާގެ ރައީސް އަބްދޫﷲ ވަހީދެވެ. އަދި ތަރުޖަމާނުގެ ނައިބަކަށް ހަމަޖައްސާފައިވަނީ ވިލިނގިލި ދާއިރާގެ ރައީސް ހުސައިން ހަސަން އެވެ. މި މަގާމުތަކަށް ބޭފުޅުން އައްޔަންކޮށްފައި މިވަނީ، މިދިޔަ ހުކުރު ދުވަހު އެ ޕާޓީގެ ކައުންސިލް އިންތިޚާބުގެ ޕްރައިމަރީ ކާމިޔާބުކަމާއެކު ބޭއްވުމަށްފަހުގައެވެ.

އަންނަ އެޕްރީލް މަހުގެ 4 ވަނަ ދުވަހު ބޭއްވުމަށް ތާވަލުކޮށްފައިވާ މި އިންތިޚާބުގައި، ޖުމްލަ 225 ދާއިރާއަކުން ލޯކަލް ކައުންސިލްތަކުގެ މެންބަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް މެންބަރުން އިންތިޚާބު ކުރާނެއެވެ.

އިލެކްޝަންސް ކޮމިޝަނުގެ ތަފާސްހިސާބުތަކަށް ބަލާއިރު، މި އިންތިޚާބުގައި ވޯޓު ދިނުމުގެ ހައްގު ޖުމްލަ 294,937 މީހުންނަށް ލިބިގެންވެއެވެ. އޭގެ ތެރޭގައި ހިމެނެނީ 150,410 ފިރިހެނުންނާއި 144,527 އަންހެނުންނެވެ. އިންތިޚާބުގެ ވޯޓުލުން ކުރިއަށް ގެންދިއުމަށްޓަކައި މުޅި ރާއްޖޭގައި ޖުމްލަ 621 ވޯޓު ފޮށި ބެހެއްޓުމަށް ވަނީ ހަމަޖެހިފައެވެ.