މިއަދު ރާއްޖޭގެ ކަންކަން ހިނގަމުންދާ ގޮތަށް ބަލާއިރު، މަރުގެ ޙުކުމް ތަންފީޒުކުރަންވެސް މި ސަރުކާރަށް ނުކެރޭނެކަން ހާމަވަމުންދާ ކަމަށް އިދިކޮޅު އެމްޑީޕީގެ ވަގުތީ ޗެއަރޕަރސަން އަދި ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވެއްޖެއެވެ.

ޣަފޫރު މިހެން ވިދާޅުވީ އެމްޑީޕީން ބޭއްވި ސިޔާސީ އެއްވުމެއްގައި ވާހަކަ ދައްކަވަމުންނެވެ. އޭނާ ވިދާޅުވީ އެމްޑީޕީން މިހާރު ކުރަމުންދާ އެންމެ މުހިންމު މަސައްކަތަކީ ރައީސް ޑރ. މުޙައްމަދު މުޢިއްޒުގެ ސަރުކާރުން ކަންކަން ކުރަމުންދާ ނޭދޭވޭ ގޮތްތައް ރައްޔިތުންނަށް ސާފުކޮށްދިނުން ކަމަށެވެ.

ސަރުކާރުގެ ސިޔާސަތުތަކަށް ފާޑުވިދާޅުވަމުން ޣަފޫރު ވަނީ، އިރާނުގެ ސުޕްރީމް ލީޑަރު އާޔަތުﷲ އަލީ ޚާމަނާއީ އަވަހާރަވުމާ ގުޅިގެން، ރާއްޖޭގެ ދިދަ ބައިދަނޑިއަށް ތިރިކޮށްލަންވެސް މި ސަރުކާރަށް ނުކެރުނުކަން ފާހަގަކުރައްވާފައެވެ. އަދި އެކަން ކުށްވެރިކޮށްލުމުގެ ހިތްވަރުވެސް ސަރުކާރުގެ ކިބައިގައި ނެތް ކަމަށް އޭނާ ވިދާޅުވިއެވެ.

"މިއީ އިސްލާމް ދީން ރައްޔިތުންނަށް ދައްކައިގެން ވެރިކަމަށް އައި ސަރުކާރުގެ މިއަދުގެ ޙާލަތަކީ. މުސްލިމުންނަށް ޙައްޤު ބަސް ބުނުމުގެ ހިތްވަރު ހުންނަންވާނެ." ޣަފޫރު ވިދާޅުވިއެވެ. މީގެ އިތުރުން، މި ކަންކަން ހިނގަމުންދާ ގޮތާ މެދު ދީނީ ޢިލްމުވެރިންވެސް ބަސްވިދާޅުވާންޖެހޭނެ ކަމަށާއި، މި ސަރުކާރުން ފެންނަނީ ހަމައެކަނި މަކަރާއި ހީލަތް ކަމަށް އޭނާ ތުހުމަތު ކުރެއްވިއެވެ.

މަރުގެ ޙުކުމާ ގުޅޭގޮތުން ވާހަކަ ދައްކަވަމުން ޣަފޫރު ވިދާޅުވީ، ސުޕްރީމް ކޯޓުން މަރުގެ ޙުކުމް ތަންފީޒުކުރަން ނިންމާފައި އޮތް ނަމަވެސް، އެކަން ކުރާނެ ފަންވަރު މި ސަރުކާރުގައި ނެތް ކަމަށެވެ.

"އެ އޮތީ ސުޕްރީމް ކޯޓުން މަރުގެ ޙުކުމް ތަންފީޒުކުރަން ނިންމާފައި، އެކަމަކު އެކަން ކުރާކަށްވެސް މި ސަރުކާރަކަށް ނުކެރޭނެ. އެހެންވީމާ ރައްޔިތުންގެ ކުރިމަތީގައި ދީނުގެ ނަމުގައި ގަދަ ބަސް ބުނުމަށްވުރެ، އަމިއްލައަށް ރަޖާ ލައިގެން ގޭގައި އޮތިއްޔާ މާ ރަނގަޅުވާނެ." ޣަފޫރު ވިދާޅުވިއެވެ.

ޣަފޫރުގެ ވާހަކަ ނިންމާލަމުން، މި ސަރުކާރުން ވެފައިވާ ވައުދުތައް ފުއްދުމުގެ ބަދަލުގައި ރައްޔިތުންނަށް ބޮޑެތި އޮޅުވާލުންތައް އޮޅުވަމުންދާ ކަމަށް ވިދާޅުވެ، އެކަންކަމާ ދެކޮޅަށް އަޑުއުފުލުމަށް ދިވެހި ރައްޔިތުންނަށް ގޮވާލެއްވިއެވެ.