މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އެތެރޭގައި އުފެދިފައިވާ ހިޔާލުތަފާތުވުންތަކަށް ހައްލެއް ލިބި، ޕާޓީގެ އިސް ލީޑަރުން ސުލްހަވުމަށް އެއްބަސްވުމާ ގުޅިގެން، ވަގުތީ ޗެއާޕާސަން އަބްދުލްގަފޫރު މޫސާ މަގާމުން ވަކިކުރުމަށް ހުށަހެޅި މައްސަލަ އަނބުރާ ގެންދިއުމަށާއި، މަގާމުން ވަކިކުރި އިސް ދެ ބޭފުޅުންގެ މަގާމު އިއާދަކުރުމަށް މިހާރު ނިންމައިފިއެވެ.

ނިމިދިޔަ ރިޔާސީ އިންތިޚާބުގެ ނަތީޖާއަށް ފަހު، އެމްޑީޕީގެ ތެރޭގައި އޮތް ފެކްޝަން ކޯޅުން ބޮޑުވެ، ވަގުތީ ޗެއާޕާސަން ޣަފޫރު ވަނީ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) އާއި ލީގަލް ޑިރެކްޓަރު އަހްމަދު މައުރޫފް މަގާމުން ވަކިކުރައްވާފައެވެ. ނަމަވެސް، ޕާޓީގެ އެތެރޭގެ މަސްލަހަތު ހިމާޔަތްކުރުމަށްޓަކައި ކުރި މަޝްވަރާތަކުން މިހާރު ވަނީ މި މައްސަލައަށް ވަގުތީ ހައްލެއް ގެނެސްފައެވެ. މިކަން ދެ ރައީސުން ވެސް މިހާރު ވަނީ ކަށަވަރުކޮށްދެއްވާފައެވެ.

މީޑިއާތަކަށް މައުލޫމާތު ދެމުން އެމްޑީޕީގެ އިސް އޮފިޝަލަކު ވިދާޅުވީ މަޝްވަރާތަކަށް ފަހު ނިންމާފައިވަނީ، ޣަފޫރު ވަކިކުރުމަށް ގައުމީ މަޖިލީހަށް ހުށަހެޅި މައްސަލަ އަނބުރާ ގެނައުމަށް ކަމަށެވެ. އަދި އޭގެ އިތުރުން މަގާމުން ވަކިކުރި އިބުރޭ އާއި މައުރޫފްގެ މަގާމު އިއާދަކުރަން ވެސް މިހާރު އެއްބަސްވެފައި ވާކަމަށް އޭނާ ވަނީ ވިދާޅުވެފައެވެ.

މަގާމުން ވަކިކުރި އިބްރާހިމް ވަހީދާއި މައުރޫފަކީ ރައީސް ނަޝީދާއި ކުރީގެ ޗެއާޕާސަން ފައްޔާޒް އިސްމާއިލްގެ ފެކްޝަނަށް ނިސްބަތްވެވަޑައިގަންނަވާ ދެ ބޭފުޅުންނެވެ. ޣަފޫރު މަގާމުން ވަކިކުރުމުގެ މައްސަލަ ވެސް ގައުމީ މަޖިލީހަށް ހުށަހެޅީ އެ ފެކްޝަނުގެ ފަރާތުންނެވެ. މި މައްސަލަ ހުށަހެޅީ ގައުމީ މަޖިލީހުގެ 123 މެންބަރުންގެ ތެރެއިން 55 މެންބަރުންގެ ސޮޔާ އެކުގައެވެ.

މި މައްސަލައާ ގުޅިގެން ގައުމީ މަޖިލީހުގެ ޖަލްސާއެއް ކުރިއަށް އޮތް ހޯމަ ދުވަހަށް ތާވަލުކުރި ނަމަވެސް، މައްސަލަ އަނބުރާ ގެނައުމަށް ނިންމުމާ ގުޅިގެން އެ ޖަލްސާ ދެން ނުބާއްވާނެއެވެ. އެހެންނަމަވެސް، މިރޭގެ ވަގުތެއްގައި ގައުމީ މަޖިލީހުގެ ކުއްލި ބައްދަލުވުމެއް ސިއްރުކޮށް ބޭއްވުމަށް ހަމަޖެހިފައިވާ ކަމަށް މައުލޫމާތު ލިބެއެވެ.