ސުވިޒަލޭންޑުން ޖެހިޖެހިގެން ފަސްވަނަ ފަހަރަށް ފީފާ ވޯލްޑް ކަޕުން ޖާގަ ކަށަވަރު ކޮށްފައިވަނީ ޔޫއެފާ ކޮލިފައިންގެ ގްރޫޕް ބީގެ އެއްވަނަ ހޯދައިގެންނެވެ. މުރާތު ޔަކިންގެ އިރުޝާދުގެ ދަށުން ކުޅޭ ސުވިޒަލޭންޑް ޓީމުން ކޮލިފައިން ނިންމާލީ ސްވިޑަން، ސްލޮވީނިއާ އަދި ކޮސޯވޯއަށް ވުރެ ކުރިހޯދައިގެންނެވެ. އެ ގައުމުން ކޮލިފައިންގެ ޖާގަ ކަށަވަރުކުރީ ފަހު މެޗުގައި ކޮސޯވޯއާ ދެކޮޅަށް ކުޅެ 1-1 އިން އެއްވަރުވެގެންނެވެ. މި ނަތީޖާއާއެކު، ހަތަރު މެޗުން މޮޅުވެ، ދެ މެޗުން އެއްވަރުވެ، ސުވިޒަލޭންޑުން ވަނީ އެއްވެސް މެޗަކުން ބަލިނުވެ ކޮލިފައިން ކާމިޔާބުކޮށްފައެވެ. އެ ޓީމުގެ އަމާޒަކީ ޖެހިޖެހިގެން ހަތަރުވަނަ ފަހަރަށް ވޯލްޑް ކަޕްގެ ނޮކައުޓް މަރުހަލާއަށް ދަތުރުކުރުމެވެ.

ކެނެޑާ، މެކްސިކޯ އަދި އެމެރިކާގައި 2026 ވަނަ އަހަރު ބާއްވާ ފީފާ ވޯލްޑް ކަޕަކީ ސުވިޒަލޭންޑުން ޖެހިޖެހިގެން ވާދަކުރާ ހަވަނަ މުބާރާތެވެ. އަދި މިއީ އެ ގައުމުން ވޯލްޑް ކަޕުގައި ވާދަކުރާ 13 ވަނަ ފަހަރެވެ. ސުވިޒަލޭންޑް ޓީމު ވަނީ 1934، 1938 އަދި 1954 ވަނަ އަހަރު ކުއާޓާ ފައިނަލަށް ދަތުރުކޮށްފައެވެ. 1994 ވަނަ އަހަރުގެ ފަހުން އެ ގައުމުން ވަނީ ހަ ފަހަރުގެ ތެރެއިން ފަސް ފަހަރު ގަދަ 16 އަށް ދަތުރުކޮށްފައެވެ. ނަމަވެސް، ގިނަ ފަހަރު ކަޓާފައިވަނީ ވަރަށް ހިތްދަތި ގޮތްގޮތަށެވެ. މީގެ އިތުރުން، އެންމެ ފަހުން ބޭއްވި ދެ ޔޫރަޕިއަން ޗެމްޕިއަންޝިޕްގައި ވެސް އެ ޓީމު ވަނީ ކުއާޓާ ފައިނަލާ ހަމައަށް ދަތުރުކޮށްފައެވެ.

ސްވިޒަލޭންޑް ޓީމުގެ ކެޕްޓަން ގްރޭނިޓް ޒާކާއަކީ ޓީމުގެ އެންމެ މުހިންމު ތަނބެވެ. އާސެނަލް އަދި ބަޔާ ލެވަކޫސަންއަށް ކުރިން ކުޅުނު، އަދި މިހާރު ޕްރިމިއާ ލީގުގެ ސަންޑަލޭންޑަށް ކުޅެމުންދާ ޒާކާއަކީ ސުވިޒަލޭންޑަށް އެންމެ ގިނަ މެޗު ކުޅެދީފައިވާ ކުޅުންތެރިޔާ އެވެ. އުމުރުން 33 އަހަރުގެ ޒާކާ ވަނީ މީގެ ކުރިން ތިން ވޯލްޑް ކަޕެއްގައި ވާދަކޮށްފައެވެ.

ކޯޗު މުރާތު ޔަކިން އަކީ ކުޅުންތެރިއެއްގެ ގޮތުގައި ގްރާސްހޮޕާސް، ފެނަބާޗޭ، ސްޓުޓްގާޓް އަދި ބާސެލް ފަދަ ކްލަބްތަކަށް ކުޅެފައިވާ ފަރާތެކެވެ. އޭނާ ވަނީ ގައުމީ ޓީމަށް 49 މެޗު ކުޅެދީފައެވެ. ކޯޗިންގ ކެރިއަރު 2006 ވަނަ އަހަރު ފެށުމަށްފަހު، އަމިއްލަ ގައުމުގެ އެކި ކްލަބްތަކަށް އިރުޝާދު ދިނުމަށްފަހު، 2021 ވަނަ އަހަރު އޭނާ ވަނީ ލަޑިމިއަރ ޕެޓްކޮވިޗްގެ ބަދަލުގައި ސުވިޒަލޭންޑްގެ ހެޑް ކޯޗުކަމާ ހަވާލުވެފައެވެ.

ގަތަރު 2022 ގެ ކޮލިފައިންގައި ދެއްކި މޮޅު ކުޅުމާއެކު، ޔަކިންގެ އިރުޝާދުގެ ދަށުން ޓީމު ގަދަ 16 އަށް ދަތުރުކުރިއެވެ. ނަމަވެސް އެ މަރުހަލާގައި ޕޯޗުގަލް އަތުން 6-1 އިން ބަލިވެ މުބާރާތުން ވަނީ ކަޓާފައެވެ. ޔޫރޯ 2024 ގައި ސުވިޒަލޭންޑުން ވަނީ އެންމެ ފަހުގެ ޗެމްޕިއަން އިޓަލީ މުބާރާތުން ބޭރުކޮށްލާފައެވެ. ނަމަވެސް ކުއާޓާ ފައިނަލުގައި އިންގްލެންޑް އަތުން ބަލިވީ ޕެނަލްޓީ ޖަހައިގެންނެވެ.

ސުވިޒަލޭންޑްގެ 2026 ވޯލްޑް ކަޕް މެޗުތައް:

13 ޖޫން: ގަތަރު - ސުވިޒަލޭންޑް (ސެން ފްރެންސިސްކޯ ބޭ އޭރިއާ ސްޓޭޑިއަމް)

17 ޖޫން: ސުވިޒަލޭންޑް - ބޮސްނިއާ އެންޑް ހެރްޒެގޮވީނާ (ލޮސް އެންޖެލެސް ސްޓޭޑިއަމް)

24 ޖޫން: ސުވިޒަލޭންޑް - ކެނެޑާ (ބީސީ ޕްލޭސް ވެންކޫވަރ)

ކޮލިފައިންގައި ސުވިޒަލޭންޑުން ވަނީ ފުރަތަމަ މެޗުގައި ކޮސޯވޯ އަތުން 4-0 އިން މޮޅުވެ، ފޯރިގަދަ ފެށުމެއް ފަށާފައެވެ. މި މެޗުގައި ބްރީލް އެމްބޯލޯ ވަނީ ދެ ލަނޑު ޖަހާފައެވެ. އޭގެ ފަހުން ސްލޮވީނިއާ އަތުން 3-0 އިން އަދި ސްވިޑަން އަތުން 2-0 އިން ވަނީ މޮޅުވެފައެވެ. ކޮލިފައިންގެ ދެވަނަ ބުރުގެ މެޗުތަކުގައި ވެސް ސުވިޒަލޭންޑުން ދޫނުދީ ކުޅުނެވެ. އެގޮތުން ސްލޮވީނިއާއާ ދެކޮޅަށް ކުޅުނު މެޗު 0-0 އިން އެއްވަރުވިއިރު، ސްވިޑަންއާ ދެކޮޅަށް ކުޅުނު މެޗު 4-1 ގެ ބޮޑު ތަފާތަކުން ކާމިޔާބުކުރިއެވެ. ކޮލިފައިންގެ ފަހު މެޗުގައި ކޮސޯވޯއާ އެއްވަރުވުމުން، އެއްވެސް މެޗަކުން ބަލިނުވެ ސުވިޒަލޭންޑުން ކޮލިފައިން ނިންމާލީ ޕޮޒިޓިވް 12 ލަނޑުގެ ތަފާތަކާއެކުގައެވެ. ޖުމްލަ 14 ލަނޑު ޖަހައި، ބައިކޮޅަށް ވަނީ އެންމެ 2 ލަނޑެވެ.

ސުވިޒަލޭންޑް ވަނީ ވޯލްޑް ކަޕްގެ ކުއާޓާ ފައިނަލަށް ތިން ފަހަރު ދަތުރުކޮށްފައެވެ. ނަމަވެސް އެންމެ ފަހުން އެ މަރުހަލާގައި ކުޅުނީ މީގެ އަހަރުތަކެއް ކުރިންނެވެ. 1954 ވަނަ އަހަރު އަމިއްލަ ގައުމުގައި ބޭއްވި މުބާރާތުގެ ކުއާޓާ ފައިނަލުން ޖާގަ ހޯދީ އިޓަލީ އަތުން 4-1 އިން މޮޅުވެގެންނެވެ. އެހެންނަމަވެސް، ކުއާޓާގައި އޮސްޓްރިއާއާ ދެކޮޅަށް ކުޅުނު މެޗުގައި 3-0 އިން ކުރީގައި އޮވެފައި، އެންމެ ފަހުން 7-5 އިން ބަލިވެ މުބާރާތުން ކަޓަން ޖެހުނެވެ. މިއީ ވޯލްޑް ކަޕްގެ ތާރީޚުގައި އެންމެ ގިނަ ލަނޑު (12 ލަނޑު) ފެނިގެންދިޔަ މެޗެވެ.

2022 ވަނަ އަހަރުގެ ގަތަރު ވޯލްޑް ކަޕްގައި ސުވިޒަލޭންޑުން ފުރަތަމަ މެޗުގައި ކެމަރޫން އަތުން 1-0 އިން މޮޅުވީ ބްރީލް އެމްބޯލޯގެ ލަނޑުންނެވެ. އޭގެ ފަހުން ބްރެޒިލް އަތުން 1-0 އިން ބަލިވި ނަމަވެސް، ތިންވަނަ މެޗުގައި ސާބިއާ އަތުން 3-2 އިން މޮޅުވެ ގްރޫޕް ޖީގެ ދެވަނަ ހޯދިއެވެ. ނަމަވެސް ގަދަ 16 ގައި ޕޯޗުގަލް އަތުން 6-1 އިން ބަލިވިއިރު، އެ މެޗުގައި ގޮންސާލޯ ރާމޯސް ހެޓްރިކެއް ހެދިއެވެ.

ސުވިޒަލޭންޑުން އެންމެ ފުރަތަމަ ވޯލްޑް ކަޕެއްގައި ވާދަކުރީ 1934 ވަނަ އަހަރު އިޓަލީގައެވެ. ހައިންރިކް މުލާގެ އިރުޝާދުގެ ދަށުން ކުޅުނު އެ ޓީމު ފުރަތަމަ މެޗުގައި ނެދަލޭންޑްސް އަތުން 3-2 އިން މޮޅުވި ނަމަވެސް، ކުއާޓާ ފައިނަލުގައި ޗެކޮސްލޮވޭކިއާ އަތުން 3-2 އިން ބަލިވެ މުބާރާތުން ވަކިވާން ޖެހުނެވެ.

1954 ވަނަ އަހަރުގެ ވޯލްޑް ކަޕްގައި ހަ ލަނޑު ޖެހި ޖޯސެފް ހޫގީއަކީ އަދިވެސް ސުވިޒަލޭންޑަށް ވޯލްޑް ކަޕްގައި އެންމެ ގިނަ ލަނޑު ޖަހައިދިން ކުޅުންތެރިޔާއެވެ. ޒެރްދާން ޝަގީރީ ވަނީ ތިން ވޯލްޑް ކަޕެއްގައި (2014، 2018، 2022) ފަސް ލަނޑު ޖަހާފައެވެ. ނަމަވެސް 2024 ވަނަ އަހަރު އޭނާ ބައިނަލްއަގުވާމީ ފުޓްބޯޅައިން ރިޓަޔާކުރުމާއެކު، ހޫގީގެ ރެކޯޑު މުގުރާލުމުގެ ފުރުސަތު މިވަގުތަށް ވަނީ ބަންދުވެފައެވެ.

ވޯލްޑް ކަޕްގައި ސުވިޒަލޭންޑަށް އެންމެ ގިނަ މެޗު ކުޅެދީފައިވަނީ ރިކާޑޯ ރޮޑްރިގޭޒް އަދި ގްރޭނިޓް ޒާކާއެވެ. ކޮންމެ ކުޅުންތެރިއަކު 12 މެޗު ކުޅެފައިވާއިރު، އެ ދެ ކުޅުންތެރިންވެސް ވަނީ ތިން މުބާރާތެއްގައި ބައިވެރިވެފައެވެ. 2026 ވަނަ އަހަރުގެ ވޯލްޑް ކަޕްގައި ވެސް މި ދެ ކުޅުންތެރިން ފެނުމުގެ ފުރުސަތު ބޮޑުކަމުން، މި ރެކޯޑު އިތުރަށް އާކުރުމުގެ ފުރުސަތު އެބައޮތެވެ.

ސުވިޒަލޭންޑްގެ ވޯލްޑް ކަޕް ތާރީޚުގައި އެންމެ ފާހަގަކޮށްލެވޭ މެޗަކީ 1954 ވަނަ އަހަރުގެ ކުއާޓާ ފައިނަލުގައި އޮސްޓްރިއާއާ ދެކޮޅަށް ކުޅުނު މެޗެވެ. ލޮޒޭންގެ ގަދަ ހޫނުގައި ކުޅުނު މި މެޗުން ސުވިޒަލޭންޑް ބަލިވީ 7-5 އިންނެވެ. މެޗުގެ ފުރަތަމަ އަށް މިނެޓުގެ ތެރޭގައި ތިން ލަނޑު ޖަހައި ސުވިޒަލޭންޑުން ކުރިހޯދި ނަމަވެސް، 40 ޑިގްރީއަށް ވުރެ މަތީގައި ހޫނުމިން ހުރުމުގެ ސަބަބުން ކުޅުންތެރިންނަށް ބޮޑެތި އުނދަގޫތަކާ ކުރިމަތިވިއެވެ. އޮސްޓްރިއާގެ ކީޕަރު ކާޓް ޝްމިޑަށް ހޫނުގެ ސަބަބުން ސިއްހީ މައްސަލަތަކެއް ދިމާވި ނަމަވެސް، އެ ދުވަސްވަރުގެ ގަވާއިދު އޮތްގޮތުން ކުޅުންތެރިން ބަދަލެއް ނުކުރެވެއެވެ. ނަތީޖާއެއްގެ ގޮތުން، އޮސްޓްރިއާގެ ފަރުވާދޭ މީހަކު ގޯލް ފަހަތުގައި ހުރެގެން ފެން ޖަހައި ކީޕަރު ފިނިކުރަމުން ދަނިކޮށް، އޮސްޓްރިއާއިން ކުޅުން ރަނގަޅުކޮށް މެޗު އަނބުރާލިއެވެ. މި މެޗަކީ މިއަދާ ހަމައަށްވެސް ވޯލްޑް ކަޕް ތާރީޚުގައި އެންމެ ގިނަ ލަނޑު ފެނުނު މެޗެވެ.

ސުވިޒަލޭންޑުން ވޯލްޑް ކަޕްގެ ދެ މެޗެއްގައި 4-1 އިން މޮޅުވެފައިވެއެވެ. އެއީ 1954 ވަނަ އަހަރު އިޓަލީއާ ދެކޮޅަށް ކުޅުނު މެޗާއި، އޭގެ 40 އަހަރު ފަހުން 1994 ވަނަ އަހަރު އެމެރިކާގައި ރޫމޭނިއާއާ ދެކޮޅަށް ކުޅުނު މެޗެވެ.