އުރުގުއޭ އަކީ 15 ވަނަ ފަހަރަށް ފީފާ ވޯލްޑް ކަޕްގައި ވާދަކުރުމަށް ތައްޔާރުވަމުންދާ ގައުމެކެވެ. މިއީ 2010 ވަނަ އަހަރު ދެކުނު އެފްރިކާގައި ބޭއްވި މުބާރާތުގެ ހަތަރުވަނަ މަގާމު ހޯދައި، ދުނިޔޭގެ ފުޓްބޯޅައިގެ ސަމާލުކަމަށް އަލުން އައި ފަހުން މެދުކެނޑުމެއްނެތި އެ ގައުމުން ޖެހިޖެހިގެން ވާދަކުރާ ފަސްވަނަ މުބާރާތެވެ. ދެކުނު އެމެރިކާ ބައްރުގެ އުނދަގޫ ކޮލިފައިން ބުރު ކާމިޔާބުކޮށް، "ލަ ސެލެސްޓޭ" މިވަނީ 2026 ވަނަ އަހަރުގެ ވޯލްޑް ކަޕުން ސީދާ ޖާގައެއް ކަށަވަރުކޮށްފައެވެ.

ކޯޗު މާސެލޯ ބިއެލްސާގެ އިރުޝާދުގެ ދަށުން އުރުގުއޭގެ ޓީމަށް މިހާރު ވަނީ ބޮޑެތި ބަދަލުތަކެއް އައިސްފައެވެ. ގައުމީ ޓީމަށް ރީތި ނަމާއި ކާމިޔާބީ ހޯދައިދިން "ރަން ޖީލުގެ" މުހިންމު ކުޅުންތެރިން ކަމަށްވާ އެޑިންސަން ކަވާނީ އާއި ލުއިސް ސުއަރޭޒް ބައިނަލްއަގުވާމީ ފުޓްބޯޅައިން ރިޓަޔަރ ކުރުމާއެކު، ފެޑެރީކޯ ވަލްވާޑޭގެ ކެޕްޓަންކަމުގެ ދަށުން އުފެދިފައިވާ އައު ޒުވާން ޓީމުން އަމާޒު ހިފާފައިވަނީ ބިއެލްސާގެ ތަފާތު ޓެކްޓިކްސްތަކާއެކު ދުނިޔެ ހައިރާންކޮށްލުމަށެވެ.

ބިއެލްސާ އަކީ ދުނިޔޭގެ އެންމެ މޮޅު ކޯޗުންގެ ތެރޭގައި ހިމެނޭ، އަދި ޒަމާނީ ފުޓްބޯޅައަށް ބޮޑެތި ބަދަލުތަކެއް ގެނައި ފަރާތެއްގެ ގޮތުގައި ގިނަ ބަޔަކު ގަބޫލުކުރާ ޝަޚްޞިއްޔަތެކެވެ. އުމުރުން 70 އަހަރުގެ މި އާޖެންޓީނާ ކޯޗު މިއަހަރު ނުކުންނާނީ އޭނާގެ ކެރިއަރުގެ ތިންވަނަ ވޯލްޑް ކަޕަށެވެ. މީގެ ކުރިން އޭނާ ވަނީ 2002 ވަނަ އަހަރު އާޖެންޓީނާއާއެކު އަދި 2010 ވަނަ އަހަރު ޗިލީއާއެކު ވޯލްޑް ކަޕްގައި އިރުޝާދު ދީފައެވެ.

2026 ވަނަ އަހަރުގެ ވޯލްޑް ކަޕްގައި އުރުގުއޭ ކުޅޭ މެޗުތައް:

15 ޖޫން: ސައުދީ އަރަބިއްޔާ އާއި އުރުގުއޭ - މަޔާމީ ސްޓޭޑިއަމް

21 ޖޫން: އުރުގުއޭ އާއި ކޭޕް ވާޑޭ - މަޔާމީ ސްޓޭޑިއަމް

26 ޖޫން: އުރުގުއޭ އާއި ސްޕެއިން - އެސްޓާޑިއޯ ގުއަޑަލަޖާރާ

މިފަހަރުގެ ޓީމުގައި ރޮޑްރީގޯ ބެންޓަންކޫރް، ހޯސޭ މާރިއާ ގިމެނޭޒް، އަދި ފެނާންޑޯ މުސްލޭރާ ފަދަ ތަޖުރިބާކާރު ކުޅުންތެރިން ހިމެނެއެވެ. މިއީ 2002 ވަނަ އަހަރަށްފަހު އުރުގުއޭގެ ތާރީޚުގައި އެންމެ ގިނަ ލަނޑު ޖެހި ކުޅުންތެރިޔާ ލުއިސް ސުއަރޭޒް ނުލައި އެ ގައުމުން ވޯލްޑް ކަޕަކާ ކުރިމަތިލާ ފުރަތަމަ ފަހަރެވެ.

އުރުގުއޭ އަކީ ވޯލްޑް ކަޕްގެ ފުރަތަމަ މުބާރާތް (1930) ބޭއްވި ގައުމުގެ އިތުރުން އެ މުބާރާތުގެ ފުރަތަމަ ޗެމްޕިއަނުންވެސް މެއެވެ. އޭގެ 20 އަހަރު ފަހުން 1950 ވަނަ އަހަރު ބްރެޒިލްގައި ބޭއްވި މުބާރާތްވެސް އެ ގައުމުން ކާމިޔާބުކުރިއެވެ. ބްރެޒިލްގެ މަރަކާނާ ސްޓޭޑިއަމްގައި ކުޅުނު އެ މުބާރާތުގެ ފަހު މެޗުގައި، ހޯސްޓް ގައުމު ބަލިކޮށް އުރުގުއޭއިން ހޯދި ތާރީޚީ ކާމިޔާބީއަކީ މުޅި ދުނިޔެ ސިއްސުވާލި ހާދިސާއެކެވެ. މިއަދުވެސް މި ހާދިސާ މަޝްހޫރުވެފައިވަނީ "މަރަކަނާޒޯ" ގެ ނަމުންނެވެ.

އުރުގުއޭއަށް ވޯލްޑް ކަޕްގައި އެންމެ ގިނަ ލަނޑު ޖަހައިދީފައިވަނީ އޮސްކާ މިގޭޒް (8 ލަނޑު) އެވެ. އުރުގުއޭގެ ޖާޒީގައި ވޯލްޑް ކަޕްގައި އެންމެ ގިނަ މެޗު ކުޅެފައިވަނީ އެޑިންސަން ކަވާނީ (17 މެޗު) އެވެ.1950 ވަނަ އަހަރު ބޮލީވިއާ އަތުން 8-0 އިން ހޯދި މޮޅަކީ ވޯލްޑް ކަޕްގައި އުރުގުއޭގެ އެންމެ ބޮޑު ކާމިޔާބީއެވެ.

2022 ވަނަ އަހަރު ގަތަރުގައި ބޭއްވި ވޯލްޑް ކަޕުން ގްރޫޕް ސްޓޭޖުން ވަކިވާން ޖެހުމުގެ މާޔޫސްކަމަށްފަހު، ބިއެލްސާގެ އިރުޝާދުގެ ދަށުން އުރުގުއޭ މިހާރު ތައްޔާރުވަނީ އަލުން ދުނިޔޭގެ ރަސްކަމަށް އެނބުރި އައުމަށެވެ. މިދިޔަ އަހަރުގެ ފަހުކޮޅު ބްރެޒިލް އަދި އާޖެންޓީނާ އަތުން އެ ގައުމު ހޯދި މޮޅުތަކަކީ މި އައު ޓީމުގެ ވަރުގަދަކަން ހާމަކޮށްދިން ހެކިތަކެކެވެ.