ހަތިޔާރާއެކު ދިވެހި ގްރޫޕަކުން އަރައި ސ. ހިތަދޫގައި ދުއްވާ ފަސްކުރި ދޯނި ހައިޖެކް ކުރަން މަސައްކަތް ކޮށްފިއެވެ.

އެ ދޯނީގެ ފަޅުވެރިންނާ ޙަވާލާދީ ރާއްޖޭގެ ބައެއް އޮންލައިން މީޑިއާ ތަކުގައި ބުނެފައިވަނީ، އެ ދޯންޏަށް ތޫނު ހަތިޔާރާއެކު ތިރީހަކަށް މީހުން އެރީ ލ.ގަމާއި 11 މޭލު ބޭރުން "ވަޑިނޮޅު" ކައިރީ ދިއްލައިގެން އެންދަމަން އޮއްވައި ރޭ 12:30 ހާއިރު ކަމަށެވެ.

އެދޯންޏަކީ ފަހުން ފައިސާ ދައްކާ ގޮތައް ވިއްކާލާފައިވާ ދޯންޏެއް ކަމަށާއި، ނަމަވެސް ދޯނިގަތް ފައިސާ ނުދައްކައިގެން ދޯނީގެ ވެރިފަރާތަކާއި ދޯނި ގަތް ފަރާތާއި ދެމެދު މައްސަލަ ޖެހިފައިވާ ކަމަށް ބައެއް މީޑިއާތަކުގައި ވަނީ ބުނެފައެވެ. އަދި މިމައްސަލަ މީގެ ކުރިން ޝަރީޢަތަށް ވެސް ވަނީ ހުށައަޅާފައެވެ.

އެމީހުން ދޯންޏަށް އަރައި މުޅިދޯނި އެމީހުންގެ ބެލުމުގެ ދަށަށް ގެންދިޔަ ކަމަށާއި، އަދި ލ. ގަމު ބަނދަރަށް ދޯނި ވެއްދުމަށް އެންގިކަމަށް ދޯނިން މަޢުލޫމާތު ދިން ފަރާތުން ވަނީ ބުނެފައެވެ. އަދި ދޯނީގައި ތިބި މީހުން ސ. މީދޫ ޕޮލިހަށް، ގުޅައި މި ޚަބަރު ދިން ކަމަށާއި، ދަންވަރު 3 ޖެހިއިރު ލ. ގަމު ބަނދަރަށް ދޯނި ވެއްދި އިރު ފުލުހުން ތިބި ކަމަށް ދޯނީގެ ފަޅުވެރިޔަކު ބުނެފައިވެއެވެ.

22 ފަޅުވެރިންނާއެކު މަސްވެރިކަމަށް ނުކުމެ އުޅުނު ފަސްކުރި ދޯނި ހައިޖެކްކުރި މީހުންގެ ނަން ނޯޓު ކުރުމަށް ފަހު ފުލުހުން އެމީހުން ދޫކޮށްލީ ކަމަށާއި، އަދި ދޯނީގައި ހުރި ހަތިޔާރުތައް ފުލުހުން ގެންގޮސްފައިވާ ކަމަށް ދޯނީގެ ފަޅުވެރިން މަޢުލޫމާތުދީފައިވެއެވެ.

އައްޑޫ ސީޓީ “ފަސްކުރި” ދޯނި ހައިޖެކްކޮށް، ފޭރެން މަސައްކަތްކުރި މައްސަލައިގައި ފުލުހުންގެ ރަސްމީ ބަހެއް ލިބިފައެއް ނުވެއެވެ.