އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ ސަރުކާރާ ދެކޮޅަށް، އިދިކޮޅު ލީޑަރު ޔާއިރް ލަޕިޑް އާއި އެހެނިހެން އިސްވެރިން ވަރުގަދަ އަޑުތަކެއް އުފުލަމުންދިޔަ ނަމަވެސް، ޣައްޒާގައި ހިންގަމުންދާ އަސްކަރީ ޢުދުވާނާއި ނަސްލު ނައްތާލުމުގެ ތުހުމަތުތަކާ މެދު އިދިކޮޅުގެ ވިސްނުން ނަތަންޔާހޫގެ ސިޔާސަތުތަކާ މާ ބޮޑު ތަފާތެއް ނެތެވެ.

ބައިނަލްއަޤްވާމީ ކޯޓުތަކާއި އިންސާނީ ޙައްޤުތަކަށް މަސައްކަތްކުރާ ޖަމްޢިއްޔާތަކުން އިޒްރޭލުން ޣައްޒާގައި ހިންގަނީ "ޖެނޮސައިޑެއް" ނުވަތަ ނަސްލު ނައްތާލުމުގެ ޢަމަލުތަކެއް ކަމަށް ބުނެ ކުރާ ތުހުމަތުތަކަށް، އިދިކޮޅު ސިޔާސީންވެސް ފާޅުގައި ދެކޮޅުހައްދަވައެވެ. އެބޭފުޅުން ވަކާލާތު ކުރައްވަނީ އިޒްރޭލް އަސްކަރިއްޔާއިން ކުރިއަށްގެންދަނީ އަމިއްލަ ދިފާޢީ ހަނގުރާމައެއް ކަމަށެވެ. އެހެންކަމުން، އިޒްރޭލުގެ ވެރިކަމަށް އިދިކޮޅު ސަރުކާރެއް އައި ނަމަވެސް، ޣައްޒާގައި ހިންގި ލާއިންސާނީ ޢަމަލުތަކުގެ އަޚްލާޤީ ނުވަތަ ޤާނޫނީ ޒިންމާ އުފުލުމުގެ އެއްވެސް ނިޔަތެއް އެބޭފުޅުންގެ ނެތްކަން ހާމަވެއެވެ.

ނަތަންޔާހޫގެ ސަރުކާރާއި އިދިކޮޅު ފަރާތްތަކާ ދެމެދު އޮތް މައިގަނޑު ތަފާތަކީ ހަނގުރާމައިގައި އިސްކަންދޭ ތަރުތީބާއި ބޭނުންކުރާ ސިޔާސީ އުކުޅުތަކެވެ. އިދިކޮޅު ލީޑަރުން ދެކެވަޑައިގަންނަވާ ގޮތުގައި، މިވަގުތު އެންމެ އިސްކަމެއް ދޭންޖެހޭ އަމާޒަކީ ހަމާސްގެ ބަންދުގައި ތިބި އިޒްރޭލުގެ އަސީރުން އެނބުރި ގެނައުމެވެ. އެކަން ޙާޞިލުކުރުމަށްޓަކައި ވަގުތީ ނުވަތަ ދިގު މުއްދަތުގެ ހަމަލާތައް މެދުކަނޑާލުމަކަށް ދާންޖެހުނު ނަމަވެސް، އެބޭފުޅުން އެކަމަށް ތާއިދުކުރައްވައެވެ. މީގެއިތުރުން، ނަތަންޔާހޫގެ ހަރުކަށި ސިޔާސަތުތަކުގެ ސަބަބުން އެމެރިކާއާއި ހުޅަނގުގެ ޤައުމުތަކުގެ އިތުރުން ޢަރަބި ދުނިޔެއާ އޮތް ގުޅުން ހީނަރުވަމުންދާތީ، އެ ގުޅުންތައް އިއާދަކުރުމަށާއި ހަނގުރާމައަށްފަހު ޣައްޒާ ބެލެހެއްޓުމުގައި ބައިނަލްއަޤްވާމީ މަޝްވަރާތަކަށް އިސްކަންދިނުމަށް އިދިކޮޅުން ބާރުއަޅައެވެ.

އިދިކޮޅު ލީޑަރަކު އިޒްރޭލުގެ ވެރިކަމާ ހަވާލުވެއްޖެނަމަ، އަސްކަރީ ރޭވުންތެރިކަމަށް އަދި ސިޔާސީ ވައްޓަފާޅިއަށް ބައެއް ބަދަލުތައް އައުމަކީ އެކަށީގެންވާ ކަމެކެވެ. އެގޮތުން، ހަމަލާތައް މެދުކަނޑާލައި އަސީރުން މިނިވަންކުރުމުގެ އެއްބަސްވުމަކަށް އައުމުގެ ފުރުޞަތު ބޮޑުވުމާއެކު، ޣައްޒާއަށް އިންސާނީ އެހީ ފޯރުކޮށްދިނުމަށް އޮތް ހުރަސްތަކަށް ލުޔެއް ލިބިދާނެއެވެ. މީގެ މައިގަނޑު ބޭނުމަކީ އިޒްރޭލަށް އަމާޒުވާ ބައިނަލްއަޤްވާމީ ފިއްތުންތަކާއި ޤާނޫނީ ފިޔަވަޅުތައް ކުޑަކުރުމެވެ. ހަމައެއާއެކު، ނަތަންޔާހޫގެ ކޯލިޝަންގައި ތިބި އިޓާމާރ ބެން-ގްވީރާއި ބެޒަލެލް ފަދަ ނަސްލީ ތަފާތުކުރުންތަކަށް ގޮވާލާ ހަރުކަށި ވަޒީރުން ސަރުކާރުން އެކަހެރިކޮށް، ސިޔާސީ ގޮތުން "މެދުމިނުގެ" މަގަކަށް ރުޖޫޢަވުމަށް އިދިކޮޅުން މަސައްކަތް ކުރާނެއެވެ.

ނިންމާލަމުން ދަންނަވާނަމަ، އިޒްރޭލުގެ އިދިކޮޅު ލީޑަރަކު ވެރިކަމަށް އައުމަކީ ޣައްޒާގެ ހަނގުރާމައަށް ވަގުތީ ލުޔެއް ލިބި، ސީޒްފަޔާއަކަށް ދިއުމަށް އޮތް ފުރުޞަތު ފަހިވެގެންދާނެ ކަމެކެވެ. ނަމަވެސް، ފަލަސްޠީނުގެ ރައްޔިތުންގެ ޙައްޤުތައް ފުރިހަމައަށް ހޯދައިދިނުމަށާއި، އިޒްރޭލުން ހިންގާފައިވާ ޖަރީމާތަކަށް އިންސާފު ހޯދައިދިނުމަށް އިޒްރޭލުގެ އިދިކޮޅު ސިޔާސީންވެސް ތާއިދެއް ނުކުރެއެވެ. އެހެންކަމުން، އިޒްރޭލުގެ އެތެރޭގެ ސިޔާސީ ވާދަވެރިކަން ކިތަންމެ ބޮޑުވި ނަމަވެސް، ފަލަސްޠީނުގެ މިނިވަންކަމާއި ސަލާމަތާ ގުޅޭގޮތުން އިޒްރޭލުން ގެންގުޅޭ އަސާސީ އަސްކަރީ ވިސްނުމަކަށް ބޮޑު ބަދަލެއް އަންނާނެ ކަމަކަށް ނުބެލެވެއެވެ.