މޯލްޑިވްސް ޒަކާތު ހައުސްއިން ވިދިވިދިގެން ތިންވަނަ އަހަރަށް އިންތިޒާމުކޮށްގެން ބާއްވާ "އިންޓަނޭޝަނަލް ޒަކާތު ކޮންފަރެންސް މޯލްޑިވްސް (އިންޒެކް) 2026" ގައި ބައިވެރިވުމުގެ ފުރުޞަތު އާންމުކޮށް ހުޅުވާލައި، ރަޖިސްޓަރީވުމުގެ މަރުޙަލާ ފަށައިފިއެވެ.

މިމަހުގެ 28 ވަނަ ދުވަހު ބޭއްވުމަށް ތާވަލުކޮށްފައިވާ މި އަހަރުގެ ކޮންފަރެންސް ޚާއްޞަކޮށްފައިވަނީ އިޖުތިމާޢީ ރައްކާތެރިކަމާއި އިޤްތިޞާދީ ގޮންޖެހުންތަކުން އަރައިގަތުމުގައި ޒަކާތުގެ ދައުރަށެވެ. އެގޮތުން މިއަހަރުގެ ކޮންފަރެންސްގެ ޝިޢާރަކީ "ރެޒިލިއަންޓް ފައުންޑޭޝަންސް: ޑިސައިފަރިންގް ވަލްނަރަބިލިޓީ، އިކޮނޮމިކް އިމްޕެކްޓް، އެންޑް ކޮލާބޮރޭޓިވް ސޭފްޓީ ނެޓްސް އިން މޮޑަން ސޮސައިޓީޒް" އެވެ.

ޒަކާތު ހައުސްއިން މަޢުލޫމާތު ދިން ގޮތުގައި، މި މަހާސިންތާގައި ދާއިރާގެ ފުންނާބު އުސް ބޭފުޅުންގެ ކީނޯޓް އެޑްރެސްތަކުގެ އިތުރުން، އެކި ދާއިރާތަކުގެ ތަޖުރިބާކާރުން ހިމެނޭ މުހިންމު ޕެނަލް ޑިސްކަޝަންތަކެއް ކުރިއަށްދާނެއެވެ. މި ބައްދަލުވުންތަކުގައި މައިގަނޑު ގޮތެއްގައި އަލިއަޅުވާލާނީ މާލީ އަދި އިޖުތިމާޢީ ނާޒުކު ހާލަތްތަކުން އަރައިގަނެ، ވިލުންވެރި މުޖުތަމަޢެއް ބިނާކުރުމަށް ޒަކާތުގެ ނިޒާމު ހަރުދަނާކުރެވިދާނެ ގޮތްތަކުގެ މައްޗަށެވެ.

މީގެއިތުރުން، ޢާއިލާތަކާއި ގޭބިސީތަކުގެ ނާޒުކު ހާލަތަށް އަންނަމުންދާ ބަދަލުތަކާއި، މާލީ ދަތިކަމުގެ ސަބަބުން އިޤްތިޞާދަށް ކުރާ ނޭދެވޭ އަސަރުތައް ކުޑަކުރުމަށް ކުރެވިދާނެ ކަންކަމާމެދު މި ކޮންފަރެންސްގައި ފުޅާ ދާއިރާއެއްގައި މަޝްވަރާކުރެވޭނެއެވެ. އަދި އެހީއަށް ބޭނުންވެފައިވާ ނިކަމެތި ޢާއިލާތައް މާލީ ގޮތުން އަމިއްލަ ފައިމައްޗަށް ތެދުވެ، ފުދުންތެރި ބަޔަކަށް ހެދުމަށްޓަކައި ބައިނަލްއަޤްވާމީ ފެންވަރުގައި ބޭނުންކުރަމުންދާ ކާމިޔާބު މޮޑެލްތަކާއި ތަޖުރިބާތައް ވެސް މި ބައްދަލުވުމުގެ ތެރެއިން ހިއްސާކުރުމަށް ވަނީ ހަމަޖެހިފައެވެ.

މި ކޮންފަރެންސްގައި ދީނީ ޢިލްމުވެރިންނާއި، އިޤްތި

ޞާދީ މާހިރުންގެ އިތުރުން، ޒަކާތުގެ ކަންކަން ބަލަހައްޓާ އިދާރާތަކާއި، ސިޔާސަތު ކަނޑައަޅާ ފަރާތްތަކާއި، މާލީ އިދާރާތަކުގެ އިސް ބޭފުޅުންނާއި މަދަނީ ޖަމްޢިއްޔާތަކުގެ މަންދޫބުން ބައިވެރިވެވަޑައިގަންނަވާނެއެވެ.

މޯލްޑިވްސް ޒަކާތު ހައުސްއިން ހާމަކުރި ގޮތުގައި، "އިންޒެކް 2026" ގައި ބައިވެރިވުމަށް ޝައުޤުވެރިވާ ފަރާތްތަކަށް ޚާއްޞަ ރަސްމީ ރަޖިސްޓްރޭޝަން ފޯމު މެދުވެރިކޮށް މިހާރު ރަޖިސްޓަރީވުމުގެ ފުރުޞަތު ވަނީ ހުޅުވާލެވިފައެވެ.