ހިޔާ މަޝްރޫޢުގެ ދަށުން މާލޭ ރައްޔިތުންނަށް 3710 ފްލެޓް ދީފައިވާ ކަމަށް ހައުުސިންގ މިނިސްޓަރ މުޙައްމަދު އަސްލަމް ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރ އަސްލަމް ވިދާޅުވީ މާލޭގެ ރައްޔިތުންގެ ތެރެއިން ކޮންމެހެން ފްލެޓް ބޭނުންވާ ހާލަތުގައި 17،073 އާއިލާ އެބަތިބިކަމަށް އެ މިނިސްޓްރީގެ ދިރާސާތަކުން ދައްކާކަމަށެވެ.

އަސްލަމް ވިދާޅުވީ، މާލޭގައި 600 އަކަފޫޓަށްވުރެ ކުދި ތަންތަންކޮޅުގައި އުޅޭ 17،073 އާއިލާއެއް އެބަތިބިކަމަށެވެ. އަދި އޭގެ ތެރެއިން 11،951 އާއިލާއަކީ އެހެން އަތޮޅުތަކުން މާލެ އައިސް ދިރިއުޅޭ ރައްޔިތުންކަމަށް އަސްލަމް ވިދާޅުވިއެވެ.

މިނިސްޓަރ ވިދާޅުވީ މިހާތަނަށް މާލޭ ރައްޔިތުންގެ ތެރެއިން ބޯހިޔާވަހިކަމުގެ މަޝްރޫޢުތަކަށް ކުރިމަތިލީ 62 އިންސައްތަ މީހުންނަށް ފްލެޓް ދީފައިވާ ކަމަށެވެ. ސަރުކާރުން މިހާރު ގެންދަނީ މި ފެށޭ މާރޗް މަހުގެ ތެރޭގައި ހިޔާ ފްލެޓްތަކަށް މީހުން ވެއްދުމަށް މަސައްކަތް ކުރަމުން ކަމަށް އަސްލަމް މިއަދު ވިދާޅުވިއެވެ.