އެމްޑީޕީ އުފެއްދުމަށް ފޯމް ހުށައެޅި މީހުންގެ ތެރޭގައި އޭނާވެސް ހިމެނޭ ކަމަށް ވިދާޅުވެ، ބްރޯޑްކާސްޓިންގ ކޮމިޝަނަށް އައްޔަނުކުރުމަށް ރައްޔިތުންގެ މަޖިލީހުން ފާސްކޮށްފައިވާ މުޙައްމަދު ފަޒީން، އޭނާ އަށް ކުރިމަތިވަމުންދާ ފާޑުކިޔުންތަކަށް ރައްދު ދެއްވައިފިއެވެ.

ރާއްޖެ ޓީވީގެ ނޫސްވެެރިޔާ މުޙައްމަދު ފަޒީން ބްރޯޑްކޮމްއަށް އައްޔަންކުރަން ފާސްވީ ރައްޔިތުންގެ މަޖިލީހުގައި އެކަމަށް މިއަދު ނެގި ވޯޓުގައި ބައިވެރިވި 55 މެންބަރުންގެ އިއްތިފާގުންނެވެ. އެ މަޤާމަށް ކުރިމަތިލެއްވި ފަރާތްތަކުގެ ތެރެއިން ފަޒީން އަށްވުރެ ގިނަ މާކްސް ހޯއްދަވާފައިވަނީ ވީމީޑިއާގެ ކުރީގެ ނޫސްވެރިޔާ ޝިފްޒާ މުސްތަފާއެވެ. ނަމަވެސް ރައީސް ޞާލިޙް މަޖިލީހަށް ނަންތައް ފޮނުއްވި ތަރުތީބުން ވޯޓަށް އެހުމުން ލިސްޓުގެ ކުރީގައި އޮތް ފަޒީނަށް ރުހުން ލިބި ޝިފްޒާގެ ނަމަށް މަޖިލީހުގެ ތަޅުމުގައި ވޯޓަށްވެސް އަހާފައެއް ނުވެއެވެ.

އެކަމާ ގުޅިގެން ކުރިމަތިވަމުންދާ ފާޑު ކިއުންތަކަށް ރައްދު ދެއްވަމުން ފަޒީން ވިދާޅުވީ، އޭނާ މަޤާމަށް ހޮވިފައިވަނީ އެމްޑީޕީގެ މެމްބަރަކަށް ވުމުން ކަމަށްބުނެ ދައްކާ ވާހަކަތަކަކީ އެއްވެސް އަސްލެއް ނެތް ވާހަކަތަކެއް ކަމަށެވެ. އަދި އޭނާ އަކީ އެމްޑީޕީ އުފައްދަން ސޮއި ކުރި މެންބަރެއްކަމަށާއި، އެމްޑީޕީވެގެން އޭނާ އަށް މަޤާމެއް ލިބޭނަމަ ލިބުނުތާ ކިތަންމެ ދުވަހެއް ވާނެ ކަމަށް ފަޒީން ވިދާޅުވިއެވެ. ފަޒީނަށް އެއްވެސް އެވޯޑެއް ނުލިބޭކަމަށް ބުނެ ދެކެވޭ ވާހަކަތަކަށް ރައްދު ދެމުން ފަޒީން ބުނެފައިވަނީ އެވޯޑަކީ ކުރިމަތިލުމުން ލިބޭ އެއްޗެއް ކަމަށެވެ.

ބުނެލަން އޮތީ، އެވޯޑަކީ ކުރިމަތިލީމަ ލިބޭ އެއްޗެކޭ. ދެން މަ އެމްޑީޕީ މެމްބަރަކަށްވީ މިއަދަކު އިއްޔެއަކު ނޫނޭ، އެމްޑީޕީ އުފައްދަން ފޯމް ހުށަހެޅި މީހުންގެ ތެރޭގައި މަ ވެސްހިމެނެޔޭ. އެހެންވީމަ މަ އެމްޑީޕީ ވެގެން ހޮވާ ނަމަ، ހޮވުނުތާ ކިތައްމެ ދުވަހެއް. https://t.co/jUfx4RTHJP

— Fazeen (DEAN)🎈 (@IamFazeen) March 2, 2021

ރައްޔިތުންގެ މަޖިލީހުން މިއަދު ބްރޯޑްކޮމްގެ މެމްބަރަކަށް ފަޒީން އައްޔަނުކުރުމުން ޢާއްމުންގެ އިތުރުން ރައްޔިތުންގެ މަޖިލީހުގެ މިނިވަން މުއައްސަސާތަކާބެހޭ ކޮމިޓީގެ ބައެއް މެމްބަރުންވެސް ވަނީ ނުރުހުން ފާޅުކުރަށްވާފައެވެ. އެގޮތުން ހެންވޭރު ދެކުނު ދާއިރާގެ މެމްބަރު ޙުސައިން ޝަހީމް ވިދާޅުވީ، ކޮމިޓީން ނިންމާގޮތަށް މަޖިލީހުން ކަންތައްތައް ފާސްނުކުރެވޭނަމަ ކޮމިޓީގައި ވަގުތުތަކެއް ބޭކާރުކުރުމުގެ ބޭނުމެއް ނެތް ކަމަށެވެ. އަދި ޢާއިލާ ބޮޑު މީހަކަށް ނުވަތަ ދާއިރާ މީހަކަށް މަޤާމުދީ ނިންމާލުން މާރަނގަޅުވާނެކަމަށް ޝަހީމް ވިދާޅުވިއެވެ.

ބްރޯޑްކޮމްގެ ހުސްވެފައިވާ މެމްބަރުކަމަށް އައްޔަންކުރެއްވުމަށް ރައީސުލްޖުމްހޫރިއްޔާ 11 ނަމެއް ރައްޔިތުންގެ މަޖިލީހަށް ހުށަހެޅުއްވިއިރު މިނިވަން މުއައްސަސާތަކާއި ބެހޭ ކޮމިޓީން ދިރާސާކުރި ނަންތަކުގެ ތެރެއިން މަޖިލީހުގެ ތަޅުމަށް ފޮނުވާފައިވަނީ ރާއްޖެޓީވީގެ ނޫސްވެރިޔާ މުހައްމަދު ފަޒީންގެނަމާއި، ވީޓީވީގައި މަސައްކަތް ކުރައްވާފައިވާ ޝިފްޒާ މުސްތަފާގެނަމެވެ.

7 މެމްބަރުން ތިއްބަވާ ބްރޯޑްކޮމްގެ މެންބަރުކަމުގައި ފަޒީންގެ އިތުރުން، ދެން ތިއްބަވާނީ ކޮމިޝަންގެ ރައީސް މަރިޔަމް ވަހީދާއާއި، ނައިބު ރައީސް އަޙްމަދު ގައިސްއާއި، މެންބަރު އާމިނަތު ސަރާޙަތު ޢިއްޒަތާއި، މެންބަރު އަމްޖަދު ވަހީދާއި، މެންބަރު ޢަލީ ޔޫސުފާއި މެންބަރު އާމިނަތު އަމީނާއެވެ.