ވަކި މީހަކަށް ވޯޓު ނުލާން ނުބުނެވޭނެ ކަމަށް އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވެއްޖެއެވެ.

ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި ގުޅިގެން ވަކިމީހަކަށް ވޯޓު ނުލާން ބުނެ، އެންޓި ކެމްޕެއިން ކުރަމުންދާ މައްސަލައަށް އިޝާރާތް ކުރަށްވައި އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވީ އިންތިޚާބުތަކާބެހޭ ޢާއްމު ޤާނޫނުގައި ހުއްދަކޮށްފައި ވަނީ ކެމްޕޭން ކުރުން ކަމަށެވެ. އަދި އެންޓި ކެމްޕޭން ކުރުމަކީ ހުއްދަ ކަމެއް ނޫން ކަމަށްވެސް ޝަރީފް ވިދާޅުވިއެވެ.

ޝަރީފް ވިދާޅުވީ، ހަމައެކަނި ހުއްދަ ލިބިގެންވަނީ ވޯޓު ހޯދަން މަސައްކަތް ކުރުން ކަމަށާއި، ވަކި މީހަކަށް ވޯޓު ނުލާން ނުބުނެވޭނެކަމަށްވެސް ޝަރީފް ވިދާޅުވިއެވެ.

Inthikhaab thaka behey aamu gaanoonu ge 28 vana adhi 29 vana maadhaa rangalhah vidhaalhuve lahvaa https://t.co/MF1SooxDKj

— Ahmed Shareef (@ShareefRangondi) March 7, 2021

މީގެއިތުރުން ކެނޑިޑޭޓެއްގެ އިންތިޚާބީ ޙައްޤަށް އުނިކަން ލިބޭފަދަ ޢަމަލެއް އެއްވެސް ފަރާތަކުން ކުރަށްވައިފިނަމަ އެ މައްސަލަ އިލެކްޝަންސް ކޮމިޝަނަށް ހުށައެޅުއްވުމަށް ޝަރީފް ވަނީ އެދިވަޑައިގެންފައެވެ. އަދި އެފަދަ މައްސަލައެއް ހުށައަޅައިފިނަމަ އެ ޝަކުވާއެއް ތަޙުޤީޤުކޮށް އަޅަންޖެހޭ ފިޔަވަޅުވެސް އަޅުއްވާނެ ކަމަށް ޝަރީފް ވިދާޅުވިއެވެ.

ކައުންސިލް އިންތިހާބް ބާއްވަން ކަނޑައަޅާފައިވާ ތާރީޚަކީ އަންނަ އޭޕްރީލްމަހުގެ 10 ވަނަ ދުވަހެވެ. ކުއްލި ނުރައްކަލުގެ ހާލަތު އުވާނުލާތީ އެކި ފަހަރު މަތީން އިންތިހާބު ލަސްކުރަމުން ގޮސް، ކައުންސިލް އިންތިހާބާ ބެހޭ ހާއްސަ ގާނޫނެއް ރައްޔިތުންގެ މަޖިލީހުން ފާސްކޮށް ކައުންސިލްތަކުގެ ދައުރު ދަންމާލުމަށްފަހު، އޭގެ ފަހުން އެ ގާނޫނަށް ވެސް އިސްލާހު ގެނަސްގެން އިންތިޚާބު ބޭއްވޭނެ މާހައުލެއް މިހާރު ވަނީ ތަނަވަސްކޮށްދީފައެވެ.