ގުރައިދޫގައި ހުންނަ ޚާއްސަ އެހީއަށް ބޭނުންވާ މަރުކަޒުގައި ބަހައްޓާ ވޯޓު ފޮށްޓަށް ރީ-ރެޖިސްޓަރ ކުރަން އެ މަރުކަރުގައި މަސައްކަތްކުރާ މުވައްޒަފުންނަށް މަޖުބޫރު ކުރަމުންދާ ކަމަށް އިދިކޮޅު، ޕްރޮގްރެސިވް ކޮންގްރެސް ކޯލިޝަނުން ބުނެފިއެވެ.

އެ ކޯލިޝަނުން މިއަދު އާންމުކުރި ނޫސްބަޔާނެއްގައި ބުނީ ކ. ގުރައިދޫގައި ހުންނަ ޚާއްސަ އެހީއަށް ބޭނުންވާ މީހުންގެ މަރުކަޒުގައި ލޯކަލް ކައުންސިލް އިންތިޚާބަށް ވޯޓުލުމަށް ބަހައްޓާ ވޯޓުފޮށްޓަށް ވޯޓު ލުމަށް ރީ-ރެޖިސްޓަރ ކުރުމަށް އެތަނުގައި މަސައްކަތްކުރާ މުވައްޒަފުންނަށް މަޖުބޫރުކުރަމުންދާ ކަމުގެ ޝަކުވާތައް އެ ކޯލިޝަނަށް ލިބެމުންދާ ކަމަށެވެ. އަދި އެއީ ކަނޑައެޅިގެން މިނިވަންކަމާއެކު ވޯޓުލުމުގެ ޙައްޤަށް އަރައިގަތުން ކަމުގައި ދެކޭކަމަށް އެ ކޯލިޝަނުން ބުނެފައި ވެއެވެ.

މީގެ ކުރިން އެ މަރުކަޒުގައި ވޯޓުލުމަށް ވޯޓު ފޮށްޓެއް ބަހައްޓާފައި ނުވާކަމަށާއި، އަދި އެތަނުގައި މަސައްކަތް ކުރާ މުއައްޒަފުންނަކީ ކ. ގުރައިދޫއަށް ނިސްބަތްވާ މުވައްޒަފުންނަށް ވެފައި، ރަށުގެ ރައްވެހިންނަށް ވޯޓްލުމަށް ބަހައްޓާ ވޯޓް ފޮއްޓަށް ވޯޓުލުމަށް އެ މުވައްޒަފުން ބޭނުންވާއިރު، ވަކި ފޮށްޓަކަށް ރަޖިސްޓްރީ ކުރުމަށް އެފަރާތްތަކަށް މަޖުބޫރުކުރުމަކީ ވޯޓަށް ނުފޫޒު ފޯރުވުން ކަމަށްވާތީ މިފަދަ ޢަމަލުތައް ހުއްޓާލުމަށް އިދިކޮޅު ކޯލިޝަނުން ވަނީ ގޮވާލާފައެވެ.

އަދި ދިވެހި ކޮންމެ ރައްޔިތަކަށްވެސް މިނިވަންކަމާއެކު އެމީހަކު ބޭނުންވާ ތަނަކަށް ވޯޓުލުމުގެ ޙައްޤު ދިވެހިރާއްޖޭގެ ޤާނޫނުއަސާސީން ލިބިދޭ ކަމަށާއި، އެކަންކަން އިލެކްޝަންސް ކޮމިޝަނުން ބަލައި އެފަދަކަންކަން ހިނގިޔަ ނުދިނުމަށް އަޅަންޖެހޭ ފިޔަވަޅުތައް އަޅައިދިނުމަށް އިދިކޮޅުގެ ނޫސްބަޔާނުގައި ގޮވައިލާފައި ވެއެވެ.

އެޗްޕީއޭގެ ގައިޑްލައިންގެ ސަބަބުން އިންތިހާބުގައި ވޯޓުލުމަށް 735 މަރުކަޒު ގާއިިމުކުރަން ޖެހޭ ކަމަށާއި، މާލޭގައި އެކަނިވެސް 68 މަރުކަޒު އަދި ކޮންމެ ފޮއްޓަކަށް 500 މީހުން ވޯޓުލާނެ ކަމަށް އީސީން ވަނީ ބުނެފައެވެ. ލޯކަލް ކައުންސިލްގެ އިންތިޚާބުގައި ވޯޓުލުމަށް ރީ-ރެޖިސްޓަރ ކުރަން ހުޅުވާލި ފުރުޞަތު އަންނަ ބުރާސްފަތި ދުވަހުގެ ނިޔަލަށް ހަމަވާނެއެވެ. އިންތިޚާބު ބޭއްވުމަށް މިހާރު ހަމަޖެހިފައިވަނީ އަންނަ އޭޕްރީލް މަހުގެ 10 ވަނަ ދުވަހުއެވެ.